Sý resýrstary jáne ırrıgasııa mınıstrligi qurylǵaly «Qazsýshar» RMK-nyń tehnıka parkin jańartý jumysy belsendi júrgizilip keledi. Búginde jańa qural-jabdyqtar men avtokólikter kásiporynnyń barlyq arnaıy tehnıkasynyń shamamen 31%-yn quraıdy, dep jazady Egemen.kz.
Búginde «Qazsýshar» RMK fılıaldary 524 jańa arnaıy tehnıka alǵan. Kásiporynǵa jalpy 757 avtokólik pen qural-jabdyq berý josparlanǵan. Mınıstrlik usynǵan tehnıkalar qatarynda ekskavatorlar, tıegishter, shynjyr tabandy ekskavatorlar, traktorlar, tirkemeler, samosvaldar, tartqysh kólikter, avtokrandar, janarmaı tasymaldaǵyshtar, qosalqy qural-jabdyqtar men dızeldi generatorlar bar.
Arnaıy tehnıka parkin aýqymdy jańartýǵa deıin kásiporynda 1 665 avtokólik pen qural-jabdyq bolǵan.
Sý resýrstary jáne ırrıgasııa mınıstri Nurjan Nurjigitovtiń aıtýynsha jańa arnaıy tehnıka qurylys-montaj jáne jumystaryn jyldam ári tıimdi júrgizýge múmkindik beredi. Sondaı-aq sý tasqynyna qarsy kúresti de jaqsartady.
«Mınıstrlik bergen tehnıka qazirdiń ózinde tikeleı maqsatyna saı paıdalanylyp, gıdrotehnıkalyq nysandardyń senimdiligin jáne ırrıgasııalyq kanaldardyń ótkizý múmkindigin arttyryp otyr», dedi N.Nurjigitov.