Bala mektepti táýir-aq oqyǵan. Biraq ulttyq biryńǵaı testileýden tómen ball jınap qaldy. Munymen memlekettik grant jalyn da sıpatpasy belgili. Buǵan renjińkiregen ákesi «Osy jurttyń balasy...» dep áńgime bastaǵaly otyrdy da, raıynan qaıtty. UBT-dan joǵary ball ıelenip, tanaýy deldıip júrgen pálensheniń, túgensheniń balasyn maqtap, óz perzentin tuqyrtqysy kelmegen.
Bala qatarlarynan qalmaı, tańdaǵan mamandyǵy boıynsha bıyl qalaıda oqýǵa túskisi keletinin bildirdi. Munyń bir ǵana joly bar, ol – aqysyn tólep oqý. Mólıgen bala keler jyly qaıta baq synar bolsa, arada bir jyl ýaqyt bos ketetinin, «temirdi qyzǵan kezde soqqan» tıimdi ekenin, bıyldan qalsa, bilim alýǵa degen atqaqtaǵan kóńili basylyp qalatynyn jetkize kelip, sońynda aqyly negizde oqýǵa jiberýin surady. Áke ulynyń meselin jyqqysy kelmeı, qoldaǵy azyn-aýlaq mal-paldy satyp, basqa da jıǵan-tergenin qosyp aqyly oqýǵa túsiretin boldy.
Ákesi ulyna qajetti qarjyny jerden qazǵandaı bolyp taýyp berdi. Qarashańyraqtyń qory oısyrap qaldy. Ata-ana senimi, artylǵan jaýapkershilik balany ári-sári kúı keshtirdi, kóńili bir tasyp, bir basyldy. Jolǵa shyǵar sátte bala ata-anasyna rııasyz peıilmen: «Tuzdaryńyzdy aqtaımyn... Erteń qartaıǵandaryńyzda qazy-qarta, jal-jaıa, bal men qaımaq berip baǵamyn», dedi.
Ákesi: «Nıetińe jet. Árbir perzenttiń áke-sheshesine «qartaıǵanda jaqsylap kútip-baǵamyn» dep ýáde berýi úırenshikti jaıt qoı... Degenmen sen álgi jyly-jumsaqty jastaý kezimizde jegiz, áıtpese qartaıǵanda onyń dámi tańdaıǵa tatymdy, qunar-qýaty tánge jaǵymdy bola qoımas. Ol kezde eshteńe kerek te bolmaı qalýy múmkin», dedi.
«Múmkindik berińiz... Senimderińizdi aqtaýǵa barymdy salamyn», dedi bala.
«Áke-sheshesiniń jigerin jasytyp, zar jylatyp, júregin julym-julym etip, bar qýatyn sarqyp, olardyń kárilik kezeńge qalt-qult etip jetýine basty sebepker bolatyn ul men qyz az ba?.. Perzent ataýlynyń kóbi ata-anamdy «qartaıǵanda jarylqaımyn» dep ózin-ózi aldaýmen júr. Áke-sheshesiniń qarttyq kezeńge jeter-jetpesine kim kepil? Ata-anaǵa balasynyń durys júrip-turǵany, ońdy adam bolǵany ǵana kerek. Sonda áke men sheshe káriliktiń aýylyna ókpesi óshpeı tyń jetedi. Tyń adamǵa jyly-jumsaq berseń janyna jaǵady, al súlderi ǵana qalǵan kári-qurtańǵa aýzyna aq maı aǵyzyp qoısań da juqpaıdy... Meniń saǵan aıtarym, kárilik kelgende peshenemizge ne jazylatynyn kezinde kórermiz, maǵan qazir keregi – seniń amandyǵyń, kóshten qalmaı, jaman atty bolmaı júrgeniń. Sonda ǵana kezi kelgende qarttyqtyń aýasyn entikpeı erkin jutamyz, ne berseń de tańdaıymyzǵa tatıdy. Áıtpese bári beker...» dedi áke.
Ata-ana senimi, rııasyz peıili, moınyna artylǵan jaýapkershilik-amanat bozbalanyń jigerin janydy, ataqty ýnıversıtettiń záýlim ǵımaratynyń esigin batyl ashty. Áke-sheshe úmitin aqtaǵan bala jaman bolmas, el amanatyn arqalaı alsa kerek. Áke sózin kókiregine túıe bilgender eldik múddeni de eskeretini sózsiz.