Qazaqstanda jol-kólik oqıǵalarynyń aldyn alý baǵytynda aýqymdy sharalar qabyldanyp jatyr. Bul Memleket basshysynyń Joldaýyn iske asyrýdyń basym baǵyttarynyń biri. Jańa zańǵa sáıkes, ortasha jyldamdyqty asyrǵany úshin jaýapkershilik kúsheıtildi, mopedterdi mindetti túrde tirkeý engizildi. Sonymen qatar usaq quqyq buzýshylyqtar úshin aıyppuldardy eskertý sharalarymen almastyrý qarastyrylǵan, dep habarlaıdy Egemen.kz.
Bıylǵy jeti aıda joldarda 25 myńnan astam tekserý júrgizilip, qozǵalys qaýipsizdigine qaýip tóndiretin myńdaǵan aqaýlar anyqtalǵan. Qadaǵalaýdyń jańa ádisteri engizilip, drondardan bastap avtomatty tirkeý kameralaryna deıingi tehnologııalar paıdalanylyp jatyr. Sonyń nátıjesinde respýblıkalyq mańyzy bar trassalarda jol apattarynan kóz jumǵandar sany 12%-ǵa azaıǵan.
QR Ishki ister mınıstri Erjan Sádenovtiń aıtýynsha, jyl basynan beri joldarda 8,5 mıllıon jol qozǵalysy erejesin buzý dereginiń joly kesilgen. Onyń ishinde 14 myńnan astam mas kúıde kólik júrgizý faktileri bar.
«Bul sharalar aýyr zardaptardyń aldyn alýǵa múmkindik berdi. Búginde sıfrlyq sheshimder qarqyndy túrde engizilýde. Máselen, quqyq buzýshylyqty tirkeý kameralary, mobıldi «jasyryn» patrýldik júıeler, drondar, qaýipti júrgizýshilerdi anyqtaýǵa arnalǵan «Qorǵaý» júıesi. Avtojoldarda ortasha jyldamdyqty baqylaý júıesi engizildi, bul osy aımaqtardaǵy apattyq jaǵdaılardy azaıtty. Jol ınfraqurylymyna baqylaý kúsheıtildi», dedi Erjan Sádenov