Qostanaı oblystyq tarıhı-ólketaný mýzeıiniń qorynda qylqalam sheberi Ábilhan Qasteevtiń on shaqty týyndysy saqtalǵan. Onyń ishinde Amangeldi bastaǵan Torǵaıdaǵy ult-azattyq kóteriliske qatysqan Ábjan Turmanov, Seıitmaǵanbet Demesinov, Syzdyq Jantileýovtiń portreti bar.
Mýzeı qory, sonymen qatar, halyq sýretshisi kenepke túsirgen «Amangeldi Imanov otrıady joryqta», «Ertegi oqý», «Ujymshar jaılaýynda», «Almaty mańy», «Poselok» kórkemsýretterin de kózdiń qarashyǵyndaı saqtap otyr.
«Sýretshiniń shyǵarmashylyq murasynda portret janry mańyzdy oryn alady. 1944 jyly Ábilhan Qasteev halyq qaharmany Amangeldi Imanovtyń portretin salǵanyn bilesizder. Osy eńbegi úshin Halyq sýretshisi ataǵy berildi. Ábilhan Qasteev 20 jyldaı 1916 jylǵy Torǵaı kóterilisi taqyrybynda eńbek etti. Amangeldi batyrdyń úzeńgiles serikteriniń portretterin saldy. Birsypyra týyndylarynda ótken ǵasyrdaǵy tarıhı oqıǵalar kórinis tapqan», deıdi mýzeıdiń ǵylymı qyzmetkeri Názıma Otasheva.
Murajaı mamandarynyń aıtýynsha, artynda bes myńnan astam kórkemsýretti mura etip qaldyrǵan qylqalam sheberiniń týyndylary Máskeýdegi Tretıakov galereıasynda, Kıevtegi Shevchenko mýzeıinde, Qyrǵyzstan, Tájikstan mýzeılerinde, Almaty, Astana, Qostanaı jáne elimizdiń basqa qalalaryndaǵy galereıalar men mýzeılerde saqtaýly tur.
Qostanaı oblysy