Búginde Soltústik Qazaqstan oblysyndaǵy aýyldyq eldi mekender men Petropavl qalasyn qosa eseptegende 444 mektep bar. Onda 74 myńnan asa oqýshy bilim alady. Sondaı-aq 448 mektepke deıingi bilim beretin uıymdar 15 myńnan asa baldyrǵandy qamtyp otyr. Bıylǵy oqýshylar sany byltyrǵymen salystyrǵanda 234 balaǵa artyq.
Jańa oqý jylynda birinshi synypqa 6 400-deı jetkinshek barady. Sonyń 3 myńǵa jýyǵy Qyzyljardyń ózinde bolsa, al qalǵany – oblys aýmaǵyndaǵy eldi mekenderde. Sonymen qatar 279 aýyldaǵy úsh myńnan asa oqýshyny 150 avtobýs tasymaldap, mektepke jetkizedi.
Oblystyq bilim basqarmasynyń basshysy Aınagúl Suraǵanovanyń aıtýyna qaraǵanda, mektep jasyndaǵy birde-bir bala oqýdan tys qalmaıdy. Oblysta tabysy tómen otbasylarda 8 myńnan artyq oqýshy bar, olardy qamtamasyz etýge bıýdjetten 1,5 mlrd teńge qarastyrylǵan. Bul bıýdjetten jalpy bilim beretin mektepterdi ustaýǵa bólingen bıylǵy qarjynyń 1,5 paıyzy. Az qamtylǵan otbasylarǵa «Mektepke jol» aksııasy aıasynda tamyzdyń basynan bastap 46 228 teńgeden bir rettik kómek jasalǵan. Búginge deıin 4 myńnan asa oqýshynyń ata-anasy ony alyp úlgerdi.
Oblys kólemindegi 24 kolledjde 11 myńǵa jýyq jasóspirim oqıdy. Bıyl birinshi kýrs tabaldyryǵyn 4 myńǵa jýyq túlek attaıdy. Olardyń 50 paıyzǵa jýyǵy jumysshy mamandyǵyn tańdaǵan.
Mektepterdi jańa oqý jylyna daıyndaý jumystary belgilengen josparǵa sáıkes iske asyryldy. Máselen, Shal aqyn aýdanyndaǵy Jaltyr mektebi, Presnov aýylyndaǵy ınternat, Aqqaıyń aýdanyndaǵy agrarlyq kolledj kúrdeli jóndeýden ótkizildi. «Keleshek mektepteri» ulttyq jobasy aıasynda salynyp jatqan Petropavldyń «Bereke» shaǵyn aýdanyndaǵy 600 oryndyq mektep qurylysy 1 qyrkúıekte aıaqtalyp, jańa oqý jylyna esigin aıqara ashpaq. Qazirdiń ózinde onda oqýǵa 500-den artyq ótinish tússe, sonyń 116-sy ǵana qazaq tilinde oqýdy qalaǵan. Bul memlekettik tildi úırenýge, oqýǵa degen qulshynysty týdyrýǵa elimizdegi bilim berý qyzmetiniń kóńil aýdarýy kemshin ekenin kórsetedi.
Oblystyq bilim salasyndaǵy sapany qamtamasyz etý departamentiniń basshysy Gúlnár Talasbaevanyń aıtýyna qaraǵanda, mektepterdiń jumysy men materıaldyq sapasyna monıtorıng úzbeı jasalady. Bıylǵy oqý jylynda oblystyń bilim salasynda 16 128 pedagog – qyzmet etedi. Sonyń 11,6 myńy mektep muǵalimderi. Jańa oqý jylynda 985 maman jetispeıdi, onyń 675-i aýyl mektepterinde. Oblystaǵy 444 mekteptiń 44-inde basshy joq.
G.Talasbaevanyń sózinshe, oblystaǵy jańǵyrtý baǵdarlamasyna 83 mektep engizilgen, departament sonyń 42-sine monıtorıng jasaǵan. Mektepter basqa jıhazdardan góri bilim oshaǵynyń ashanasyna jaraqtar alýda belsendilikpen kózge túsken. 42 mekteptiń 38-inde qaýipsizdik sharalaryn jolǵa qoıý durys sapaǵa jetkizilgen. О́kinishke qaraı, áli kúnge deıin 27 mektep attestasııalaýdan ótpegen.
Oblystaǵy M.Qozybaev atyndaǵy Soltústik Qazaqstan ýnıversıtetinde bıylǵy oqý jylynda 5 835 stýdent oqıdy. Onyń negizgi bóligi, ıaǵnı 5 354 bakalavr, 286 magıstrant, 14 doktorant. Byltyr joǵary oqý ornyn aıaqtaǵan túlekterdiń 84 paıyzy jumysqa ornalasqan. Bıyl «Serpin» baǵdarlamasymen 65 túlek ýnıversıtetti támamdasa, sonyń 63-i jumysqa qabyldanǵan.
Jańa oqý jylynda kóshe men mektep qaýipsizdigine erekshe mán berilip otyr. Osyǵan oraı oblystyq PD ózderiniń jumysyn birneshe baǵytqa bólgen. Mektep mańyndaǵy jol qaýipsizdigi – sonyń alǵashqy baǵyty. Ákimshilik polısııasy bul baǵyt boıynsha jol belgileriniń, aıryqtarynyń anyq jáne balalarǵa kórneki bolýyn qadaǵalaıdy.
Sondaı-aq 31 tamyzdan bastap, 9 qyrkúıekke deıin «Abaı bolyńyzdar, balalar!» atty aksııa júrgiziledi.
Soltústik Qazaqstan oblysy