Elordada «Qazaqstan Respýblıkasynyń Konstıtýsııasy: 30 jyl memlekettiliktiń, el egemendiginiń, zańdylyq pen quqyqtyq tártiptiń kepili» ataýymen dóńgelek ústel ótti. Aıtýly mereke qarsańyndaǵy jıynda zań ústemdigin damytý, sot tóreligi júıesin jetildirý jáne demokratııalyq ınstıtýttardy nyǵaıtý máseleleri talqylandy. Basqosýdy Qazaqstan halyq partııasy uıymdastyrdy, dep habarlaıdy Egemen.kz.
Otyrysqa Májilis depýtattary, Konstıtýsııalyq sottyń, Ádilet mınıstrliginiń, Sot ákimshiliginiń, Ortalyq saılaý komıssııasynyń, Parlamentarızm ınstıtýtynyń ókilderi, sondaı-aq táýelsiz sarapshylar qatysty. Dóńgelek ústel ashylýynda sóz alǵan QHP tóraǵa orynbasary, fraksııa jetekshisi, Májilis depýtaty Magerram Magerramov Konstıtýsııa memleketimizdiń tiregi ári quqyqtyq júıeniń negizi ekenin aıtty.
«Keıingi 30 jyl ishinde Konstıtýsııa elimizdiń memlekettiligin nyǵaıtyp, azamattardyń quqyǵy men erkindigin qamtamasyz etetin basty qujatqa aınaldy. Ol demokratııalyq ınstıtýttardyń damýyna jol ashyp, qoǵamdy ortaq qundylyqtar tóńiregine toptastyrdy. Eldiń damý baǵytyn aıqyndap, jańǵyrý úderisiniń irgetasyna aınaldy. Búginde osy kezeńge kóz júgirtsek, Ata Zańymyzdyń táýelsizdikti bekemdeýde, quqyqtyq memleket qurýda, zań ústemdigin qamtamasyz etýde, sondaı-aq el ishindegi turaqtylyq pen tynyshtyqty saqtaýda mańyzdy ról atqarǵanyn baıqaımyz. Konstıtýsııanyń 30 jyldyǵy – qoǵam aldynda turǵan jańa syn-qaterlerdi talqylaýǵa, quqyqtyq júıeniń ári qaraı damýy men Konstıtýsııanyń árbir azamattyń ómirindegi róli jóninde pikir almasýǵa múmkindik», deıdi depýtat.
Jıynda 2022 jylǵy referendýmnan keıin Konstıtýsııaǵa 33 bap boıynsha 56 túzetý engizilgeni týraly aıtyldy. Osy rette Májilis depýtaty Marat Báshimov konstıtýsııalyq baqylaý jóninde baıandama jasap, bul mehanızmniń zań ústemdigin qamtamasyz etýdegi mańyzdylyǵyn atap ótti.
«Engizilgen ózgeristerdiń basty maqsaty – adam quqyqtaryn joǵary deńgeıge kóterý, qoǵamdyq baqylaýdy kúsheıtý, quqyq qorǵaý ınstıtýttaryn damytý boldy. Búginde Konstıtýsııalyq sot óte tıimdi jumys istep jatyr. Tek bıyldyń ózinde Konstıtýsııalyq sotqa 2450 ótinish kelip tústi. Eń mańyzdysy – kez kelgen azamattyń sotqa tikeleı júginý quqyǵy bar. Mundaı múmkindik kóp elderdiń zańdarynda joq. Al bizde ár azamat, eger qandaı da bir zań normasy Konstıtýsııaǵa qaıshy dep eseptese, ótinish bere alady. Sondaı-aq Adam quqyqtary jónindegi ýákildiń quzyreti kúsheıtilip, shalǵaı aımaqtarda ókildikter quryldy. Bul da jaıdan-jaı emes. Qazir jańa Konstıtýsııanyń normalary men qaǵıdattaryna súıenip ómir súrip jatqan jańa býyn ósip keledi. Bul – halqymyz úshin úlken ıgilik», deıdi M.Báshimov.
Basqosý qorytyndysynda qatysýshylar mereıli 30 jyldyq aıasynda Konstıtýsııany tek tarıhı qujat retinde qurmettep qana qoımaı, onyń qaǵıdattaryn kúndelikti ómirde basshylyqqa alý, quqyqtyq mádenıetti qalyptastyrý jáne azamattyq jaýapkershilikti kúsheıtý qajet ekenin jetkizdi.