Ár adamnyń ómirinde júrek qalaýymen tabatyn súıikti isi bolady. Bireý úshin ol syrnaıdyń sazy bolsa, bireý sýret salýdy unatady, endi bireýleri qolónermen aınalysqandy jany súıedi. Al búgingi keıipkerimiz Nurgúl úshin ol – ıne men jiptiń, matanyń, órnektiń álemi. Bala kúninen qýyrshaǵyna kóılek tigip, qııalyndaǵy úlgilerdi qaǵazǵa túsirip, ony matamen úılestirgen kishkentaı qyzdyń armany búginde úlken ónerge aınaldy.
Onyń alǵashqy ustazy – anasy. Tigin mashınasynyń syńǵyryna elitip ósken búldirshin anasynan shulyq pen sharf toqýdy da úırengen.
«Anam maǵan kishkentaı kezimde-aq tigin mashınasymen qalaı jumys isteý kerek ekenin úıretken. Sol kezderi ol ne tikse de soǵan qarap otyryp tájirıbe jınaı bergenmin. Anamnan úlgi alyp óz ónerimdi ári qaraı shyńdaǵym kelgen», deıdi ol.
Mine, sol bala kezden bastalǵan qyzyǵýshylyq ony búgingi kásibı tiginshige aınaldyrdy. Núrgúl úshin tigin – jaı kásip emes, júrektiń tynysy.
«О́z jumysymdy demalysym dep esepteımin. Tiginmen aınalysqanda bar nazarym tek ıne men jipte bolady, eshteńe alańdatpaıdy. Jaqsy dúnıe shyǵarsam – sonyń ózi baqyt», deıdi ol.
Nurgúl kásibı jolyn «JOLTAP» jobasy aıasynda bastaǵan. 2023 jyldyń mamyr aıynda Astana qalasy ákimdiginiń bastamasymen iske qosylǵan bul joba búginde elordalyqtar úshin jańa kásip ıgerýdegi taptyrmas múmkindik.
Memleket basshysy Qasym-Jomart Toqaev 2025 jyldy «Jumysshy mamandyqtar jyly» dep jarııalap, qoǵamda adal eńbektiń qadirin arttyrýǵa basa nazar aýdarǵan bolatyn. Osy ıdeıanyń naqty iske asqan kórinisi – JOLTAP jobasy desek artyq emes. Mine, dál osy múmkindiktiń arqasynda Nurgúl óziniń súıikti isin kásipke aınaldyryp otyr.
Adamzattyń tigin óneri tym tereńnen bastaý alady. Arheologtar Sibirden tabylǵan eń kóne ıneniń 30 myń jyl buryn paıdalanylǵanyn aıtady. Ol súıekten oıylyp, ushyna jińishke sińir ótkizilgen. Alǵashqy kıimder janýar terisinen jasalyp, adamdy sýyqtan qorǵaǵan.
Keıinirek adamdar zyǵyr, jún, kendirden mata toqyp, órkenıetter ózine tán sán úlgisin qalyptastyrdy. Mysyrda – jeńil zyǵyrdan tigilgen kıimder, Qytaıda – jibek, Eýropada – sándi saraı kıimderi. Qazaq dalasynda da kıim tigýdiń ózindik dástúri bolǵan: analarymyz kıiz basyp, ishikten bastap sáýkele men kamzolǵa deıin óz qolymen órnektegen.
Iаǵnı, tigin óneri – qarapaıym turmystyq qajettilikten bastalyp, mádenıet pen ónerdiń aınasyna aınalǵan kásip. Búginde sol kóne dástúrdiń jalǵasy Núrgúl sııaqty sheberlerdiń qolynda jańasha túrlenip otyr.
Búginde ol ásirese keshki kóılekter men uzatý toıyna arnalǵan ásem kıimderge tapsyrys kóp alatynyn aıtty. Sońǵy jyldary etnostıldegi kıimderge suranys artqanyn erekshe atap ótti.
«Qazaqtyń ulttyq naqyshtaǵy oıý-órnekterin zamanaýı úlgide túrlendirip kórsetkim keledi. Bizde qanshama ańyz-áńgimeler, ertegiler, keıipkerler bar. Ár oıýdyń óz tarıhy bar. Solardyń bárin ásem kıimge aınaldyrý – meniń armanym», deıdi Nurgúl.
Keıipkerimiz otandyq dızaınerlerdiń eńbegin de joǵary baǵalaıdy.
«Ár dızaınerdiń óz qoltańbasy bar. Ulttyq naqyshty zamanaýı úlgimen úılestirip júrgender kóp. Biraq bir kemshin tusy – bizde mata óndirisi damymaǵan. Kóbi shetelden ákelinedi. Eger Qazaqstanda mata óndirisi jolǵa qoıylsa, kıim baǵasy da qoljetimdi bolar edi», degen oıyn da jasyrmaı jetkizdi.
Tiginshi bolý – tek qolynyń eptiligi ǵana emes, jan dúnıeniń náziktigi men jaýapkershiligi.
«Uqypty bolý – tiginshiniń basty qasıeti. Al eń birinshi – tapsyrys berýshiniń kóńilinen shyǵý. Tutynýshy razy bolsa, biz úshin odan asqan baqyt joq», deıdi Núrgúl.