Aldaǵy 16-17 qyrkúıek kúnderi Almatydaǵy Respýblıka saraıynda birtýar kompozıtor Nurǵısa Tilendıevtiń 100 jyldyǵyna arnalǵan «Qustar» konsertiniń álemdik premerasy bastalatyny belgili.
Qazirdiń ózinde 80 mln teńgeden astam qarajat jumsalǵan mýltımedııalyq dýman ózin-ózi aqtaı ma? Aýqymdy jobany júreksinbeı qolǵa alǵan halyqaralyq deńgeıdegi talanttar toby árbir áni qulaǵymyzǵa sińgen qazaqy kompozıtordyń áýenderin óz qalybynda bere ala ma? Interpretasııa jetegindegi jobadan Tilendıevtiń qoltańbasyn kóre alamyz ba? Osy maqsatta Almatyda joba jetekshileri men álemge áıgili skrıpkashy ári dırıjer Marat Bısenǵalıev jýrnalıstermen kezdesti.
О́ıtkeni «Qustar» – jaı konsert emes, Nurǵısa Tilendıevtiń mýzykalyq murasymen órilgen óner men qazaq klassıkteriniń naqyl sózderine toly eksklıýzıvti baǵdarlama bolǵaly otyr.
«Qustar» – kompozıtor Nurǵısa Tilendıevtiń ǵasyrlyq toıyna arnalǵan mýltımedııalyq shoý ǵana emes. Bul – bizdiń kórermenge, ásirese jas urpaqqa jańa baǵyt berý jolyndaǵy talpynysymyz. Sondaı-aq mýltımedııalyq shoýdan kanadalyq kompozıtor Dmıtrıı Varelasty, osy jobada áýede qustar sııaqty qalyqtap júrip óner kórsetetin Úndistan sımfonııalyq orkestriniń (Symphony Orchestra of India) oryndaýyndaǵy Mýmbaı dybystaryn, plastıkalyq jáne beıneleý teatrynyń qarlyǵashy Anna Verdeniń rejıssýrasy men horeografııasyn, Marat Bısenǵalıevtiń vırtýozdyq skrıpkasyn, hordyń ǵajaıyp úılesimi men halyq aspaptarynda oınaıtyn Abzal Aryqbaev pen Anar Qasymovanyń qaıtalanbas talantyn kórýge bolady.
Degenmen, jobany óz bastamamyzben júzege asyryp otyrmyz. Sonymen qatar ıdeıany júzege asyrý men baǵdarlamany ázirleý barysynda kompozıtordyń týyndylaryn paıdalanýǵa múmkindik bergen, múddelilik tanytyp ári senim artqan Nurǵısa Tilendıevtiń qyzy – Dinzýhraǵa shynaıy alǵys aıtamyz», deıdi jobanyń bas prodıýseri Qaırat Qulbaev.
Aıtqandaı, bıyl óziniń 20 jyldyǵyn atap ótip jatqan «Symphony Orchestra of India» Almatydaǵy premeraǵa alǵash ret kelgeli otyr. Al osynaý óner ujymyn álemge ózin moıyndatqan qandasymyz – Qazaqstannyń beıbitshilik elshisi Marat Bısenǵalıev qurǵanyn eske salý lázim.
Bir sózben aıtqanda, Almaty osyndaı erekshe dýmanǵa daıyndalyp jatyr. Al «Qustar» jobasy jalǵasyn tabady. Ázirge albomy jazylyp, stýdııalyq jumystary aıaqtaldy. Odan bólek uıymdastyrýshylar jobanyń vınıl albomyn da shyǵaryp, birneshe elge gastroldik saparmen barýdy josparlap otyr.
ALMATY