2025 jyldyń mamyr aıynda Enbek.kz elektrondy eńbek bırjasynda oqýshylarǵa arnalǵan «Meniń jazǵy kanıkýlym» arnaıy bólimi iske qosyldy. Onyń kómegimen demalys kezinde 14 pen 18 jas aralyǵyndaǵy 5,4 myń jas qazaqstandyq jumysqa ornalasqan, dep habarlaıdy Egemen.kz.
Jalpy jazǵy maýsymda 16-18 jastaǵy jastar tarapynan 13,6 myń túıindeme ornalastyrylsa, 14-15 jas aralyǵyndaǵy jasóspirimderdiń ata-analary 356 jeke kabınet ashyp, onyń ishinde 112 ata-ana 129 túıindeme jibergen.
Eńbek jáne halyqty áleýmettik qorǵaý mınıstrliginiń habarlaýynsha, eńbek kodeksine sáıkes, 14 jastan bastap jasóspirimder tek densaýlyqqa zııansyz, sabaqtan tys ýaqytta oryndalatyn jumystarǵa ǵana qabyldana alady. Osy talaptarǵa sáıkes shamamen 80 mamandyq belgilengen. Olardyń qatarynda tárbıeshiniń kómekshisi, dúken satýshysy, tazalaýshy, kýrer, SMM-menedjer sııaqty qyzmetter bar.
1 qyrkúıektegi derek boıynsha, «Meniń jazǵy kanıkýlym» bóliminde 305 jumys berýshi tarapynan osyndaı 2,1 myń bos jumys orny jarııalanǵan. Aıta keterligi, usynystardy tikeleı jumys berýshiler engizetindikten, keıbir óńirlerde mundaı bos oryndar bolmaýy múmkin. Degenmen, atalǵan fýnksıonal aldaǵy ýaqytta da saqtalyp, jazǵy kezeńde kámeletke tolmaǵandardy jumysqa ornalastyrýǵa múmkindik beredi. Ol úshin jumys berýshiler bos jumys orny jarııalaǵan kezde arnaıy belgi qoıýy qajet.