Ońtústik Koreıanyń Kvandjý qalasynda sadaq atýdan álem chempıonaty ótip jatyr. Jer-jahannyń ár qıyrynan jınalǵan quralaıdy kózge atqan mergender bir apta boıy saıysqa túsip, 10 júlde jıyntyǵyn sarapqa salady.
Sadaq atýdan álem chempıonaty 1931 jyldan beri ótip keledi. Bıyl ol 52 márte jalaýyn jelbiretip otyr. Sol aralyqta AQSh quramasy eń kóp tabysqa qol jetkizdi. Amerıkalyqtar 132 (63 altyn+37 kúmis+32 qola) márte jeńis tuǵyryna kóterildi. Olardyń basty básekelesteri Ońtústik Koreıanyń mergenderi 111 (59+27+25) júlde aldy. Odan keıingi satylarǵa Shvesııa (18+20+20), KSRO (14+8+4), Polsha (13+12+9) jaıǵasty. Sondaı-aq TOP-10 komandanyń qatarynda Italııa (11+9+8), Ulybrıtanııa (9+18+27), Fransııa (8+15+13), Danııa (7+11+9), Reseı (7+5+6) bar. Atalǵan jarysta barlyǵy 27 memlekettiń ánurany shyrqalyp, 44 eldiń týy bıikte jelbiredi.
Júlde alǵan komanda qatarynda elimiz de bar. 1993 jyly Túrkııanyń Antalıa qalasynda ótken baıraqty básekede klassıkalyq sadaq atýdan synǵa túsken Iаna Týnııans qola medal aldy. 1972 jyly Almatyda dúnıege kelgen Iаnanyń basqa da halyqaralyq jarystarda jeńip alǵan júldeleri jeterlik. 1997 jyly Ystanbulda ashyq aýada uıymdastyrylǵan komandalyq álem chempıonatynda kúmispen kúptelip, 1998 jyly Bangkoktaǵy Azııa oıyndarynda úzdik úshtikti túıindedi. Onyń aldynda KSRO chempıony atanyp, Gran-prı dodalarynda daralandy.
Arada 32 jyl ótse de elimizde sol Iаna Týnııanstiń erligin qaıtalaıtyn bir mergen tabylmaı tur. Odan keıin de elimizdiń sadaq atýshylary álem chempıonatynda talaı márte boı kórsetti. Biraq birde-bireýi jeńis tuǵyryna kóterile almady. Kvandjýdaǵy dodada Ilfat Abdýllın, Dastan Kárimov, Ivan Bercha, Samıra Jumaǵulova, Dıana Tursynbek, Aleksandra Zemlıanova (klassıkalyq sadaq), Andreı Tıýtıýn, Aqbaráli Qarabaev, Dilmuhammed Musa, Ádel Jeksenbınova, Vıktorııa Lıan, Roksana Iýnýsova (bloktyq sadaq) syndy sportshylar baq synap jatyr. Báseke 12 qyrkúıekte óz máresine jetedi.