Soltústik Qazaqstannyń egis alqaptarynda oraq naýqany qyzý júrip jatyr. Keıingi aptadaǵy jaýyn-shashyn qoldy sál bógegenimen, aldyndaǵy kúnder dıqandar úshin qolaıly boldy. Bıyl 4,3 mln gektar jerge dán egilgen. 3 mln gektar negizgi dándi daqyldarǵa arnalsa, 979 myń gektar jerge maıly daqyldar sińirildi. 392 myń gektarǵa – jemshóp, 9 myń gektarǵa – kartop, 1,4 myń gektarǵa kókónis otyrǵyzyldy.
Aýyl sharýashylyǵy jáne jer qatynastary basqarmasynyń basshysy Dáýren Toqýjınovtyń aıtýynsha, ylǵaldyń moldyǵy arqasynda daqyldardyń shyǵymy birdeı bolyp, joǵary ónim alýǵa jaqsy jaǵdaı týdyrǵan.
«Búginde astyq alańdarynyń 486 myń gektary jınalyp, 800 myń tonnadaı astyq bastyryldy. Ázirge gektar berekesi 14,5 sentnerden aınalýda. Al burshaq tuqymdastardy (burshaq pen jasymyq) jınaý 70%-ǵa jetti. Qazirdiń ózinde 350 myń tonnadaı dán alyndy», deıdi.
Osy jasymyq daqylyna alys shetelderden de suranys bar eken. Qazirdiń ózinde M.Jumabaev aýdanyndaǵy «SK Agro» JShS egis alqaptarynan jasymyqty Túrkııadan kelgen fýralar tıep ketip jatqan kórinedi. Jasymyq ósirgen basqa sharýashylyqtardyń da bıylǵy shyǵymy joǵary. Mysaly, «Shatılo ı K» sharýashylyǵy gektaryna 18 sentnerden alsa «Kantemır Agro» men «Rýstıkýs» JShS 20 sentnerden ónim alyp jatyr. Búginge deıin burshaqtektes tuqym ónimderiniń alys shetelderge eksporttalýy 90 myń tonnaǵa jetken. Sonyń ishinde burshaǵy – 35 myń, jasymyǵy – 55 myń tonna. Dáýren Toqýjınovtyń aıtýyna qaraǵanda, jasymyqty 1 gektarǵa egý shyǵyny astyqtyń 1 gektarǵa ósiriletin shyǵynymen birdeı. Alaıda jasymyqtyń naryqtaǵy baǵasy bıdaıdan 2 ese artyq. Sondyqtan dıqandar onyń tabystylyǵyna qyzyǵady.
Úkimet tarapynan jasalǵan jeńildetilgen nesıeniń arqasynda kóktemgi egiske deıin astyq alqaptaryna barlyǵy 340 myń tonna mıneraldy tyńaıtqysh jetkizildi. Aýyl sharýashylyǵy mınıstrligi oraq naýqanyna qajetti 58,2 myń tonna dızeldi otyndy jeńildetilgen 254 teńgemen bosatty. Osy jyly sharýalar 38,3 mlrd teńgege 1 395 dana jańa tehnıka satyp aldy. Bıylǵy oraq naýqanyna oblys boıynsha barlyǵy 7 myń kombaın shyqsa, sonyń 4 myńy – joǵary sapaly.
Soltústik Qazaqstan oblysy