Aıaqtalǵan aptada Almaty qalasynyń ákimi Darhan Satybaldy ǵımarattardy sáýlettik jaryqtandyrý jumystaryn jedeldetýdi tapsyrdy, dep jazady Egemen.kz.
Búginde megapolıstegi ǵımarattardyń syrtqy jáne sáýlettik jaryqtandyrý júıesin jańǵyrtý boıynsha aýqymdy jumys jalǵasyn taýyp otyr. Baǵdarlamany iske asyrý qala kóshelerin anaǵurlym qaýipsiz etip, qoǵamdyq keńistikterdi kórkeıtedi.
Energetıka jáne sýmen jabdyqtaý basqarmasynyń dereginshe, jyl sońyna deıin qaladaǵy 1189 aýmaqta 20 myńnan astam sham men torsher ornatylǵan. Jumys barlyq aýdandy qamtyp, kósheler tolyqtaı jaryqtandyrylady. Qazirdiń ózinde Áýezov aýdanynda joba aıaqtalyp, Medeý aýdanynda jalǵasyn tapqan. Basqa aýmaqtarda da jumys qarqyn alǵan.
Sáýlettik jaryqtandyrýǵa da erekshe kóńil bólinip otyr. Bıyl 70 ǵımarat pen áleýmettik nysannyń jaryq berý júıesi jańartylmaq. Qazir onyń 25-inde jumys tolyq aıaqtaldy, atap aıtsaq, olar turǵyn úıler, mektepter, medısınalyq mekemeler jáne joǵary oqý oryndarynyń ǵımarattary.
Darhan Satybaldy jaryqtandyrý júıesin damytý qalanyń turmys sapasymen tikeleı baılanysty ekenin ataı kele: «Sáýlettik jaryqtandyrý jumystaryn jedeldetip, kóshe shamdaryna qatysty barlyq nysandy qatań baqylaýǵa alý qajet. Bul tek kórkeıtý emes, qala turǵyndarynyń qaýipsizdigi úshin de asa mańyzdy sharýa», – dedi. Jobanyń tıimdiligin arttyrý úshin «Almaty Qala Jaryq» kásipornynyń jumysyn kúsheıtý jáne zamanaýı «aqyldy» tehnologııa engizý usynyldy. Ornatylyp jatqan shamdar Smart Lighting júıesine qosylýǵa múmkindik beretin arnaıy qurylǵylarmen jabdyqtalǵan. Bul bolashaqta jaryqtandyrýdy avtomatty túrde basqarýǵa jol ashady.
Ákim Energetıka jáne sýmen jabdyqtaý basqarmasyna sáýlettik jaryqtandyrý boıynsha qalǵan ǵımarattarda jumysty jedeldetýdi, aýdan ákimdikterine resýrsty jumyldyryp, kóshe jaryǵynyń barlyq nysanyn erekshe baqylaýda ustaýdy tapsyrdy.