Keıingi jeti aıda elordadaǵy №2 kópsalaly balalar aýrýhanasynda 500 myń teńgeden asatyn ondaǵan tegin operasııa jasalǵan, dep jazady Egemen.kz.
Kópsalaly qalalyq №2 balalar aýrýhanasynda torınolarıngologııa, neırohırýrgııa jáne ortopedııa salasyndaǵy kúrdeli ári joǵary tehnologııalyq operasııalardyń tolyq spektri jasalady. Joǵary tehnologııalyq ota jasaýǵa kópsalaly dárigerler toby qatysyp, zamanaýı jabdyqtar men ımplanttar, ınnovasııalyq emdeý tásilderi qoldanylý qajet. Mundaı operasııalardy jasaýǵa mıllıondaǵan qarajat kerek bolǵanmen balalar úshin kúrdeli otalar tegin jasalady.
Máselen aýrýhanada balalarǵa estý qabiletin qaıtaratyn kohlearlyq ımplantasııa jasalady.
2024 jyly stasıonar jaǵdaıynda 827 mln teńgege 108 operasııa jasalǵan. Sońǵy 7 aıda 536 mln teńgeden asatyn 68 operasııa ótken.
Neırohırýrgııa salasynda da kúrdeli otalar jasalyp jatyr. Bas súıek jaraqattary, isik nemese týa bitken patologııa kezinde arnaıy plastınalar qoldanylady. Bul ota dárigerden zergerlik dáldikti, erekshe tájirıbeni jáne qymbat jabdyqty talap etedi. Mundaı medısınalyq kómekbalalardyń ómirin saqtap, aýyr múgedektiktiń aldyn alady. Sondaı-aq, mamandar neıronavıgasııa men neıromonıtorıng arqyly mı isikterine ota jasaıdy.
2024 jyly 68 mln teńgege 39 ota jasalǵan. Bıylǵy jeti aıda 38 mln teńgege 21 ota ótken.
2024 jyldyń sońynda aýrýhanada jańa qyzmet túri – jambas-san býynyn endoprotezdeý engizildi. Dárigerler alǵashqy otalardy 4,6 mln teńgege jasaǵan.
«Búgingi kúnge deıin biz jambas-san býynyn aýystyrý boıynsha 7 operasııa jasadyq. Bul protezderdi arnaıy qor satyp áperdi. Al emdeýdiń ózi áleýmettik medısınalyq saqtandyrý qory esebinen júrgizildi. Balalar ortopedııasynda birneshe baǵyt bar, eń qymbaty – onkoprotezdeý, ol densaýlyq saqtaý mınıstrligi tarapynan qamtamasyz etiledi. Budan bólek, biz mıkrohırýrgııalyq otalar jasaımyz, onyń quny shamamen 800 myń teńge. Jyl sońyna deıin taǵy úsh jambas-san býynyn aýystyrý operasııasyn jasaý josparlanýda», dedi ortopedııa bóliminiń meńgerýshisi Aǵabek Shyqynaev.