Bokstan Anglııanyń Lıverpýl qalasynda ótken álem chempıonatynda top jarǵan jerlesimiz Aıda Ábikeeva týǵan jerine oraldy. Álemdik arenada atoı salǵan boksshymyzdy janashyrlary, jankúıerleri Qaraǵandydaǵy Saryarqa áýejaıynan kútip aldy. Chempıonǵa qurmet kórsetip, gúl shoqtaryn tartý etti, dep habarlaıdy Egemen.kz.
Oblys ákiminiń orynbasary Álibek Áldeneı men oblystyq sport basqarmasynyń basshysy Serik Sápıev te arnaıy kelip, jyly lebizin bildirdi. Kenshiler shaharynyń turǵyndary jáne jankúıerler chempıonǵa qoshemet kórsetti.
Sonymen qosa, Á.Moldaǵulova atyndaǵy mektep-ınternat kolledjiniń dırektory, oblystyq máslıhat depýtaty Erden Halılın men oblystyq ulttyq sport túrleri qaýymdastyǵynyń atqarýshy dırektory Temirhan Abylaev ta jerlesimizdi jarqyn jeńisimen quttyqtady.
Aıdanyń ákesi Nurlan Djaparkýlov pen anasy Qarlyǵash Abıkeeva da batyr qyzdaryn qýanyshpen qarsy aldy.
– Maǵan jankúıer bolyp, qoldaý kórsetken barsha qazaq eline alǵysymdy aıtamyn. Bárińizdiń qoldaýyńyz sezildi. Áýeli basqarma basshylyǵyna, federasııaǵa alǵysymdy bildiremin. Qoldaý kórsetip, senim artty. Jattyqtyrýshylarym barlyq qarsylasyma jeke-jeke taktıka qoıdy. Sonyń nátıjesinde jeńiske jettim. Osy tusta jattyqtyrýshylaryma alǵys aıtamyn. Keler jyly Azııa oıyndary bar. Soǵan daıyndalamyn. Odan keıin Olımpıada oıyndary kútip tur, – dedi chempıon.