Búgin Májilis Mádenıet jáne aqparat mınıstrligi ázirlegen arhıv isi boıynsha ózgerister men tolyqtyrýlar engizý týraly zań jobasyn birinshi oqylymda maquldady, dep jazady Egemen.kz.
Zań jobasynda qujattardyń jańa túrlerin qosa otyryp, Ulttyq arhıv qorynyń quramy naqty anyqtalady. Olardyń qatarynda tájirıbelik- konstrýktorlyq, jobalyq-smetalyq jáne qala qurylysy qujattamasy, Qazaqstannan tys jerde túpnusqa retinde tabylǵan arhıvtik qujattardyń kóshirmeleri, sondaı-aq basqa da materıaldar bar.
Tarıhı-mádenı murany saqtaý maqsatymen memlekettik bıýdjet qarajaty esebinen jasalǵan aýdıovızýaldy qujattardyń kóshirmelerin jeke jáne zańdy tulǵalardyń arhıvterge mindetti túrde tapsyrýy týraly normany engizý usynylyp otyr. Bul shara Ulttyq arhıv qoryn táýelsiz Qazaqstan tarıhynyń oqıǵalary men derekterin kórsetetin qujattarmen tolyqtyrýdy qamtamasyz etedi.
Eńbek kodeksine, sondaı-aq «Ulttyq arhıv qory jáne arhıvter týraly», «Elektrondy qujat jáne elektrondy sıfrlyq qoltańba týraly», «Agroónerkásip kesheni jáne aýyldy aýmaqtardy damytýdy memlekettik retteý týraly», «Derbes derekter jáne olardy qorǵaý týraly» zańdarǵa ózgerister engiziledi.