Shyǵys Qazaqstan oblysy, Kúrshim aýdany, Maraldy aýylynda belgisiz sebepten iri qara mal óle bastaǵan. Turǵyndardyń aıtýynsha, olardyń barlyǵy altyn fabrıkasynyń mańynda jaıylǵan, dep habarlaıdy Egemen.kz.
Maraldydaǵy altyn óndirý fabrıkasyna qatysty máselege turǵyndar buǵan deıin de san márte narazylyq týdyrǵan.
Iri qara maldyń ólip jatqan beınejazbasy jýyqta áleýmettik jelide taraı bastady.
«19 qyrkúıek kúni sıanıdpen altyn óndirip jatqan zaýyt mańynda aýylymyzdyń maly qyryldy. Qazir 7-8 bas ólip jatyr, bul alǵashqy jaǵdaı emes. Osylaı jalǵasa berse adam ólimi bola ma dep qorqamyz» dedi áleýmettik jelide beıneúndeý joldaǵan turǵyndar.
Kúrshim aýdanynyń ákimi Meıirjan Álibekov osy jaǵdaıǵa baılanysty sanıtarııalyq-epıdemıologııalyq qyzmet jáne veterınarııa salasynyń mamandarymen birlesken arnaıy komıssııa qurylyp, tekserý júrgizip jatqanyn aıtty.
Belgili bolǵandaı, oqıǵa ornyna baryp, ólgen maldan synama alyndy. Jeti kúnniń ishinde qorytyndy shyǵady. Sonda ǵana naqty aqparat beriledi. Maldyń fabrıka mańynda jaıylǵany týraly aqparat ta anyqtalady. 20 qyrkúıek kúni qosymsha tekserý júrgizilip, basqa maldan da osyndaı jaǵdaıdyń tirkelgen-tirkelmegeni anyqtaldy.
Shyǵys Qazaqstan oblysy,
Kúrshim aýdany