Bala kúnimizde shalǵaı aýyldarǵa deıin respýblıka kólemine tanymal ánshiler kelip, óner kórsetetin. Biz usynyp otyrǵan sýret – sonyń bir dáleli. Bul fotony maǵan týysqan aǵam jiberdi. Onyń tarıhy da qyzyq.
1975 jyly qazaqtyń aıaýly qyzy, áıgili ánshi, Halyq qaharmany Roza Baǵlanova Torǵaı ólkesin aralap, konsert qoıady. Sonda KSRO halyq ártisiniń joly bizdiń aýylǵa da (Qostanaı oblysy Amangeldi aýdany Qabyrǵa aýyly) túsedi. Aýyl azamattary alystan at terletip kelgen ánshini aldynan shyǵyp, qudadaı kútip alady. Bul týraly qazir jasy jetpisti alqymdaǵan Ǵalymjan Qudabaev aqsaqal aıtyp berdi.
«Bizge ol kisi kórshi «Abaı» keńsharynan keldi. Aýyl basshylary Qojabaı degen jerde kıiz úı tigip, qarsy aldy. Men ol kezde poshtada isteımin. Jasym jıyrmaǵa kelgen jigitpin. Roza apamyzdy aldynan shyǵyp, gúlmen kútip aldyq. Mal soıyldy. Barynsha qurmet kórsetildi. Qasynda eki-úsh-aq adam bar. Sol jyldary ujymshar ortalyǵyna elektr júıesi endi tartylyp jatqan edi. Sondyqtan jaryq úılerge motormen beriletin. Aldymen ol kisi keshkurym dalada konsert qoıdy. Oǵan aýyldyń barlyq turǵyny taıly-tuıaǵy qalmaı keldi. Tup-tunyq aspan. Shildeniń maqpal keshi. Dala sahnasynda ánshi bulaqtaı syńǵyrlaǵan ásem daýsymen halyq ánderinen bastap, el ishine keń taraǵan «Aq mańdaılym», «Ádemi», «Ah, Samara-gorodok»-ty tamyljyta shyrqady. Tyńdarmandardyń qulaq quryshyn qandyrdy. Jasy úlken qarııalar oǵan dán rıza bolyp, batasyn berdi. Kelesi kúni klýbta qoıdy. Oǵan keńshardaǵy tórt bólimsheniń barlyq adamy jınaldy. Bizden keıin Roza apamyz Úrpek aýylyna ketti», dedi ol.
Ǵalymjan aǵamyzdyń aıtýynsha, sol jyldary aýylǵa birtýar kompozıtor, Halyq qaharmany Nurǵısa Tilendıev «Otyrar» orkestrimen, «Iаshlyk» toby jáne t.b. belgili ánshiler de kelip, óner kórsetipti. Munyń shet jaǵasyn biz de kórdik. Mektepte oqyp júrgende aýylǵa Roza Rymbaeva, Maqpal Júnisova, Aqjol Meıirbekov, Naǵıma Esqalıeva sekildi esimderi elimizge málim ónerpazdar kelgen edi. Qazir mundaı jaǵdaı óte sırek.
Endi sýretke toqtalaıyq. Búginde Roza Baǵlanovany orta-ǵa alyp túsken azamattardyń eshbiri ómirde joq. Olardyń bári de aýdan, aýyl kóleminde laýazymdy qyzmet atqarǵan tulǵalar. Alaıda bul jádiger aıtýly ánshiniń el adamdarymen túsken beınesi arqyly sol ýaqyttyń tynysyn sezindiredi.