Qazaqstannyń fýtbol klýbtary 2002 jyldan beri UEFA músheligine engen. Mundaı múshelik fýtbol ujymdaryna Chempıondar lıgasynyń negizgi kezeńderinde baq synaý úshin irikteý týrnırlerine qatysýǵa múmkindik beredi, dep jazady Egemen.kz.
Buǵan deıin elimizdiń aıaqdop sheberlerinen quralǵan komandalar arasynda alǵash bolyp 2015/16 jylǵy maýsymda «Astana» fýtbol klýby Chempıondar lıgasynyń negizgi kezeńinde dop tepti. Elordalyq klýb kıprlik APOEL-di jalpy esepte 2-1 esebimen jeńip tarıhqa túreń salǵan edi.
Al toptyq kezeńde «Astana» álemniń alpaýyt komandalary ıspandyq «Atletıko Madrıd», túrkııalaq «Galatasaraı» men portýgalııanyń «Benfıka» fýtbol klýbtaryna qarsy jasyl alańǵa shyqty.
«Astana» óz alańynda Grızmann, Fernando Torres bastaǵan «Atletıko Madrıdpen» 0-0 esebimen teń túsip, jarqyn emosııa syılaǵany jankúıerler esinde bolsa kerek?! «Astana» toptyq kezeńniń óz alańynda ótken matchtarynda «Galatasaraı», «Benfıkamen» de teń túsken bolatyn.
Al jańa tarıh bıyl jazylǵaly tur. On jylǵa jýyq úzilisten keıin «Qaırat» komandasy klýbtyq trofeıdiń negizgi kezeńine joldama aldy. «Qaırattyń» trofeı jolyndaǵy taǵdyry shotlandııalyq «Seltıkpen» penaltı serııasy arqyly sheshildi. Sheshýshi matchta «Qaırattyń» jas qaqpashysy Temirlan Anarbekov 3 birdeı soqqyny sátti toqtatty.
«Qaırattyń» qarsylastary 28 tamyzda Monakoda Chempıondar lıgasynyń negizgi kezeńi boıynsha ótken jerebede anyqtaldy. Nátıjesindde «Qaırat» «Real» (Madrıd), «Inter» (Mılan), «Arsenal» (London), «Brıýgge», «Sportıng» (Lıssabon), «Olımpıakos», «Pafos» jáne «Kopengagen» klýbtarymen bir topqa tústi. Onyń tórteýi Almatyda, al qalǵan tórteýi syrt alańda ótedi.
Almatylyq klýb óz alańynda «Realdy», «Brıýggeni», «Olımpıakosty» jáne «Pafosty» qabyldasa, syrt alańda «Inter», «Arsenal», «Sportıng» jáne «Kopengagenmen» oınaıtyny belgili bolǵan.
70 jyldyq tarıhy bar otandyq komanda Chempıondar lıgasyndaǵy alǵashqy matchyn ótkizip úlgerdi. Klýb bul lıgadaǵy debıýtinde 4-1 esebimen ese jibergenmen, oıyn barysyndaǵy «Sportıng» kapıtany Morten Iýlmannyń 11 metrlik soqqysynan qaqpasyn qorǵap qalýy jankúıerlerdi tánti etti. Almatylyq klýbtyń esebine jazylǵan jalǵyz goldy Edmılson 86-mınýtta saldy.
Jasyratyny joq jankúıerler «Qaırattyń» kelesi qaıratty qarsylasy koroldik klýbpen oıyndy asyǵa kútip otyr. Otandastarymyz Chempıondar lıgasynyń 15 dúrkin chempıondarymen almaly shahardyń «Ortalyq stadıonynda» 30 qyrkúıek kúni kezekti matchyn ótkizedi.
Mańyzdy machty «Qazaqstan» jáne «Qazsport» arnalary 21:35-te tikeleı efırde kórsetedi.