Elimizde kólik jasaý ónerkásibi sońǵy jyldary qarqyndy damyp, ekonomıkanyń mańyzdy draıverine aınaldy. Memlekettik baǵdarlamalar men jeke ınvestısııalardyń nátıjesinde jańa óndiris oryndary ashylyp, avtomobıl qurastyrý kólemi jyldan jylǵa artyp keledi. Sala mınıstri Ersaıyn Naǵaspaevtyń aıtýynsha, bıyl jańa ónim shyǵarý jáne zaýyttardy jańǵyrtý boıynsha 20-dan astam joba júzege asyrylyp, myńdaǵan jumys oryndary ashylǵan. Soǵan oraı kólik jasaý isiniń jetekshi zaýyttardyń biri Hyundai Trans Kazakhstan óndirisiniń jemisi men jetistigin, joba men josparyn surap bildik, dep jazady Egemen.kz,
Qazaqstan avtokólik odaǵynyń dereginshe, 2024 jyly elimizde 44 myńnan astam Hyundai kóligi satylyp, bıylǵy bes aıda 20 myńnan asa avtokólik ıesin tapqan. Dıstrıbıýtor da bul derekterdi rastaı otyryp óndiristiń úsh jyl qatarynan satylym kórsetkishi boıynsha birinshi oryndy ıelenip, kósh bastap turǵanyn málimdedi.
Tutynýshy tańdaýyn aıqyndaıtyn faktorlar
Kólik óndirisindegi suranysqa áser etetin negizgi faktorlardy mamandar birneshe baǵytqa bóledi. Birinshiden, baǵa men sapa araqatynasy. Elimizdegi tutynýshylardyń basym bóligi orta tapqa jatady, olardyń satyp alý qabileti shekteýli. Sondyqtan «arzan, biraq senimdi» kólikterge suranys joǵary. Sarapshylardyń pikirinshe, baǵa tek bastapqy qundy emes, kóliktiń búkil ómirlik sıklindegi shyǵyndardy qamtıdy: janarmaı únemdiligi, qosalqy bólshekterdiń qoljetimdiligi, servıstik qyzmettiń shyǵyny.
Ekinshiden, zamanaýı dızaın men tehnologııalyq jabdyqtalý deńgeıi. Qazirgi tutynýshy kólikti tek qozǵalys quraly emes, áleýmettik mártebe men kúndelikti ómirdiń bir bóligi retinde qabyldaıdy. Hyundai Auto Kazakhstan sarapshylary kóliktiń qaýipsizdik júıeleri, júrgizýshige kómekshi fýnksııalar, mýltımedııalyq ınterfeıstiń qazaq tilinde bolýy sııaqty qosymshalar sheshýshi ról oınaıtynyn aıtady:
«El turǵyndary arasynda Tucson, Elantra, Mufasa jáne Santa Fe modelderi tanymal. Bul eń aldymen senimdiligi dáleldengen qozǵaltqyshtar men berilis qorabyna, baǵa men sapanyń ońtaıly araqatynasyna, zamanaýı dızaıny men baı jabdyqtalýyna baılanysty», deıdi.
Úshinshiden, dılerlik ortalyqtar men servıstik qyzmettiń keńeıýi. El aýmaǵy keń bolǵandyqtan, servıs qoljetimdiligi satyp alýshy senimine tikeleı yqpal etedi. Eger resmı ortalyq kóp bolsa, tutynýshy óz tańdaýyna senimdi bolady. Bul jerde qosalqy bólshekterdiń jetkiliktiligi de mańyzdy.
Tórtinshiden, trade-in júıesi sııaqty qoljetimdi tetikterdiń damýy. Buryn eski kólikti satyp, jańasyn alý úshin aılap ýaqyt qajet bolsa, qazir trade-in bul úderisti jeńildetti. «Trade-in júıesi Qazaqstandaǵy barlyq resmı Hyundai dılerlik ortalyqtarynda jumys isteıdi. 2025 jyldyń alǵashqy bes aıynda Hyundai satyp alǵan klıentterdiń 6 paıyzy osy qyzmetke júgindi. Bul – eski kólikti zańdy ári yńǵaıly jolmen jańa kólikke jańartý múmkindigi», dep túsindiredi Hyundai mamandary.
Qarjylandyrý – sheshýshi tetik
Joǵaryda atalǵan faktorlardyń bári mańyzdy bolǵanymen, tutynýshy úshin basty másele – qoljetimdi baǵa. Avtonaryqta tıimdi nesıe bolmasa, baǵa men sapa, dızaın men servıske qatysty artyqshylyqtardyń bári naqty satyp alýǵa aparmaıdy. Hyundai bul baǵytta ájeptáýir tájirıbe jınaqtaǵan.
«2025 jyldyń birinshi jartyjyldyǵynda jylyna 4 paıyzdyq mólsherlememen jeńildetilgen avtonesıe baǵdarlamasy júzege asty. Bul memlekettik baǵdarlama emes, dıstrıbıýtordyń ekinshi deńgeıli banktermen birlesken arnaıy usynysy boldy. Ol barlyq modelderge taraldy, al Palisade úshin – 1%, Tucson úshin – 3,5%. Alaıda mundaı baǵdarlamalar turaqty emes, qazirgi tańda 4 paıyzdyq nesıe ýaqytsha toqtatyldy», deıdi kompanııanyń resmı jaýaby.
Búginde eń kóp suranys bes jylǵa beriletin, bastapqy jarnasy 10-30 paıyz aralyǵyndaǵy nesıelerge túsip otyr. Hyundai mamandarynyń aıtýynsha, tájirıbe kórsetkendeı, bes jyldyq óteý merzimi aı saıynǵy tólem men jalpy artyq tólem arasyndaǵy teńgerimdi saqtaıdy. Bul azamattardyń qarjylyq josparlaýǵa beıimdelgenin ańǵartady.
Jańa modelder jáne óndiristiń kemeldenýi
Kólik óndirisiniń áleýetin baǵalaýda jańa modelderdiń shyǵýy erekshe oryn alady. Jaqyn arada Almatydaǵy zaýytta jańartylǵan Hyundai Palisade modeliniń óndirisi bastalady. Satylymy 2025 jyldyń tamyz aıyna josparlanyp otyr. Maqsaty – modeldi jańartý ǵana emes, otandyq óndiristiń tehnologııalyq deńgeıin arttyrýǵa baǵyttalǵan. Sarapshylardyń aıtýynsha, aldaǵy ýaqytta gıbrıdti jáne elektrli modelderge nazar aýdarý – ýaqyt talaby.
Sonymen qatar, qosalqy bólshekterdi jergilikti óndirý keńeıip keledi. Almaty ındýstrııalyq aımaǵynda oryndyq shyǵaratyn zaýyt iske qosyldy, mýltımedııalyq júıelerdi óndiretin kásiporyn jumysyn bastady. Bul – elimizdegi avtomobıl óndirisiniń áleýettengenin bildiretin mańyzdy qadam.