Jetisý óńirinde áleýmettik qoldaýdy kúsheıtýge baǵyttalǵan taǵy bir qadam jasaldy. Aqsý aýdanynda «Januıa» otbasyn qoldaý ortalyǵy iske qosylyp, bul oblys boıynsha ashylǵan toǵyzynshy nysan bolyp otyr, dep jazady Egemen.kz.
Mamandardyń aıtýynsha, «Januıa» ortalyqtarynyń basty mindeti – ómirlik qıyndyqqa tap bolǵan otbasylarǵa jan-jaqty kómek kórsetý. Munda turǵyndar tegin quqyqtyq, psıhologııalyq jáne áleýmettik keńes ala alady. Arnaıy daıyndyqtan ótken zańgerler men psıhologtar, áleýmettik qyzmetkerler azamattardyń máselelerin sheshýge barynsha járdemdesýde.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaevtyń sózinshe, mundaı ortalyqtardyń ashylýy – oblystaǵy otbasylardyń bolashaǵyna jasalǵan naqty qoldaý.
– Bizdiń maqsatymyz tek keńes berýmen shektelmeıdi. Jumysqa ornalastyrý, quqyqtyq qorǵaý, psıhologııalyq demeý kórsetý – barlyǵy qamtylǵan. Bul ortalyqtar halyqqa shynaıy kómek kórsetetin ortaǵa aınalady, – dedi ol.
Jergilikti turǵyndar da jańa bastamany qýana qabyldaýda. Jansúgirov aýylynyń turǵyny, kóp balaly ana Marııam Dúısenbına:
– Buryn mundaı qyzmetke qol jetkizý qıyn edi. Endi mamandardyń kómegin kez kelgen ýaqytta, tegin alýǵa múmkindik bar. Bul biz úshin úlken demeý, – dep rızashylyǵyn bildirdi.
Aıta keteıik, 2025 jyly Taldyqorǵan qalasynda da jańa ortalyq ashylmaq. Qazirgi tańda «Januıa» jobasy oblystyń toǵyz qala men aýdanyn qamtyp otyr. Bıylǵy jyldyń ózinde 212 otbasynan 570-ten astam adam túrli baǵyttaǵy qoldaýǵa júgingen.