Qonaev qalasynyń 55 jyldyǵyna oraı mádenı-sporttyq is-sharalar joǵary deńgeıde atalyp ótti. Jańa nysandar paıdalanýǵa berildi. Sonyń biri ári biregeıi kelýshilerdiń kóńilin ósirip, tynysyn keńeıtetin sán-saltanaty kelisti jańa demalys ornynyń qyzyǵyn qala jurtshylyǵy kóre bastady. Jasyl jelekti alańqaıda serýendegen qalalyqtardyń qarasy kóp. Demalys aımaǵy Qoıshymanov – Almaty kósheleriniń qıylysynda ornalasqan. Nysannyń jalpy aýmaǵy 6 527 sharshy metrdi quraıdy.
Aımaq tolyqtaı kógaldandyrylǵan, sándik aǵashtar men kópjyldyq ósimdikter otyrǵyzylǵan. Oryndyqtar, átkenshekter men landshaftyq elementter kóńil toǵaıtady. Keńistik ekologııalyq, fýnksıonaldyq jáne estetıkalyq talaptarǵa saı jasaqtalýymen erekshelenedi.
Munda «О́mir aǵashy» atty art-nysan aıryqsha kóz tartady. Ol «Altyn Adam» kıim úlgileriniń elementteri beınelengen tas qurylym túrinde oryndalǵan. Qasynda osy beınelerdiń tarıhı mańyzyn baıandaıtyn QR-kod ornatylǵan.
Jańa alańqaıda jaıaý júrginshi joldary, fotoaımaqtar, qorshaý men arkalyq qurylymdar qarastyrylǵan. Arnaıy ázirlengen tujyrymdamaǵa sáıkes, bul keńistik jaı ǵana demalys orny emes, otbasylyq serýen men mádenı demalystyń mekenine aınalary anyq.
Almaty oblysy