Fýtzaldan 2026 jyly ótetin Eýropa chempıonatynyń sońǵy irikteý synynda Italııaǵa ese jiberip, qart qurlyqtyń basty dop dodasynan shet qalǵannan keıin elimiz quramasynyń úsh birdeı beldi oıynshysy ulttyq komanda sapynan ketetinderin resmı túrde málimdedi.
Birinshi bolyp Shyńǵys Esenamanov málimdeme jasady. Áleýmettik jelide ol: «Dostar, men 16 jyl boıy elimizdiń quramasy sapynda óner kórsettim. Sol aralyqta jeńis te, jeńilis te boldy. Jankúıerler bizdi árkez qoldap otyrdy. Sol úshin de barshańyzǵa alǵys aıtqym keledi. Maǵan eń bastysy, ulttyq komandanyń jeıdesin kıip, álemniń ár qıyrynda ótken baıraqty básekelerde óz elimizdiń ánuranyn shyrqatý edi. Ol armanyma jettim. Endi qosh aıtysatyn kez keldi», degen jazba qaldyrdy.
1989 jyly Qaraǵandy qalasynda dúnıege kelgen Shyńǵys biraz shyńdy baǵyndyrdy. Sporttyq mansabyn jergilikti «Tulparda» bastady. Jeti jyl boıy sol komandanyń namysyn qorǵap, alty ret el birinshiliginiń kúmis júldegeri atandy, bir ret qola medal ıelendi. Kýboktik saıysta eki márte bas júldeni oljalady. 2012, 2015 jyldary elimizdiń eń úzdik fýtzalshysy dep tanyldy. Odan keıin segiz jyl «Qaırattyń» sapynda oınady. Almatylyqtarmen birge talaı dúbirli dodada daralandy. ÝEFA kýbogi men sýperkýbogin jeńip aldy. 2009–2015 jyldar aralyǵynda el quramasynyń sapynda jasyndaı jarqyldady. 2016 jyly Eýropa chempıonatynyń qola júldegeri atandy. Ulttyq komanda sapynda Shyńǵys barlyǵy 116 kezdesý ótkizdi. Bul – rekordtyq kórsetkish. Sol oıyndarda 33 ret mergendik tanytty. Endi mine, 36 jastaǵy ámbebap fýtzalshy óz ornyn ókshelep kele jatqan jastarǵa bosatýdy jón kórdi.
Sh.Esenamanovpen birge Dýglas Jýnıor da Qazaqstan quramasy sapyndaǵy mansabyn aıaqtaıtynyn málimdedi. Onyń da jasy 36-da. Uzaq ýaqyt Chehııada óner kórsetken brazılııalyq legıoner 2014 jyly «Qaırattyń» jeıdesin kıdi. 10 maýsym boıy klýbtyń tasqamal qorǵaýshysy boldy. 2015 jyly Qazaqstannyń azamattyǵyn qabylady. Fýtzalda Dýglastyń da baǵyndyrmaǵan belesi joq. 10 jyl ishinde 91 ret alańǵa shyqqan ol 65 márte mergendik tanytyp, jańa rekord jasady. Qazirde Jýnıor Saýd Arabııasynyń «Ala-Ýla» klýbynyń namysyn qorǵap júr.
Kóp keshikpeı Leo Mendonka elimizden ketetinin aıtty. 38 jastaǵy brazılııalyq fýtzalshy juldyzdy kezeńin «Qaıratta» ótkizdi. Almatylyq komandanyń sapynda kóptegen jetistikke qol jetkizdi. 2015 jyldan beri Mendoka halyqaralyq dodalarda elimizdiń atynan synǵa túse bastady. Qol jetkizgen tabystary tolaǵaı. Keıinnen Portýgalııanyń «Sportıngine» aýysty.
«Men munda kelgen bette Alataý baýraıyndaǵy ásem shahar birden ózine baýrap aldy. Jergilikti halyqtyń qarapaıymdylyǵy men qonaqjaılyǵyna tánti boldym. Qazaqstandy kımaı ketip baramyn. Barshańyzǵa myń alǵys. Sizderdiń arqalaryńyzda el tanıtyn azamatqa, álemdik deńgeıde moıyndalǵan fýtzalshyǵa aınaldym», dep Leo áleýmettik jeli arqyly óziniń aqjarma kóńilin bildirdi.