AQSh prezıdenti Donald Tramp One America News telearnasyna bergen suhbatynda bıyl engizilgen baj salyǵynan túsetin tabys 1 trln dollardan asýy yqtımal ekenin aıtty, dep jazady Egemen.kz.
Onyń aıtýynsha, bul qarajattyń negizgi bóligi memlekettik qaryzdy óteýge jumsalmaq. Sonymen qatar Aq úı basshysy amerıkalyqtarǵa da tólem jasalýy múmkin ekenin jasyrmady.
«Biz 1000-2000 dollar qarajatty adamdarǵa bólip bere bastaýymyz múmkin», dedi Tramp.
AQSh qarjy mınıstrliginiń málimetinshe, federaldyq úkimettiń memlekettik qaryzy búginde 37,86 trln dollarǵa jetken. Buǵan deıin qarjy mınıstri Skott Bessent keden salyǵynan túsetin tabys 500 mlrd dollardan asýy múmkin ekenin aıtqan bolatyn.
Tramp ákimshiligi bıyl kóktemde búkil ımporttyq taýarǵa 10% baj salyǵyn engizdi. Keıin keıbir elderge bul kórsetkish 20-50% aralyǵynda belgilendi. Qazaqstannan keletin taýarlarǵa tarıf 25% bolyp bekitildi.