Dúnıejúzilik qolónershiler keńesiniń sheshimimen Almaty shaharyna «World Craft City» – álemdik qolóner qalasy mártebesi berildi. Bul mártebe kúni keshe ǵana Alataý etegindegi ásem shaharda bastalǵan «ALA CRAFT 2025» halyqaralyq festıvalinde saltanatty túrde jarııa etildi. Aýqymdy is-sharaǵa bizden basqa, Azııa, Eýropa, Aýstralııa, AQSh elderinen kelgen 100-den astam sheber qatysty.
«Almatyǵa «World Craft City» mártebesiniń berilýi – qalamyz úshin aıtýly jetistik. Bul kórkem shahardyń kreatıvti ındýstrııa men mádenı týrızm ortalyǵy turǵysyndaǵy halyqaralyq bedelin kóteredi. Sonymen qatar otandyq qolónerimizdi álemdik deńgeıde tanytyp, qala ekonomıkasyna ıntegrasııalanǵan turaqty ekojúıesin qalyptastyrýǵa jol ashady», dedi Almaty qalalyq Týrızm basqarmasynyń basshysy Ǵalııa Toqseıitova.
Festıval barysynda Dúnıejúzilik qolónershiler keńesi Azııa-Tynyq muhıty aımaǵynyń prezıdenti «Jude van der Merwe» shaharymyzdyń osy mártebege laıyq ekenin jetkizdi.
«Bul Almaty qalasynyń qolónerdi damytý men halyqaralyq mádenı yntymaqtastyqqa qosqan úlesin moıyndaý dep túsinýge bolady. Munda sheberlerge jaqsy qoldaý kórsetiledi, salt-dástúrdi saqtap, keler urpaqqa jetkizýge barynsha jaǵdaı jasalǵan. Bul – Dúnıejúzilik qolónershiler keńesiniń maqsatyna tolyq sáıkes keledi», dedi ol.
Mysaly, bıylǵy alty aıda Almatyǵa 1,14 mln týrıst kelse, onyń 323 myńy – sheteldik qonaqtar. Aıtqandaı, festıvaldiń este qalarlyq erekshe sátiniń biri – alyp kúshtiń ıesi, buǵan deıin de tórt ret álem rekordyn jańartyp, Gınnes rekordtar kitabyna aty jazylǵan otandasymyz Sergeı Syrýlnıkov erekshe óner kórsetip, jańa álemdik rekord jasady. Ol nebári 54 sekýndtyń ishinde toǵyz temir taǵany maıystyrdy.
ALMATY