Elimizde eńbek ınspektorlary júrgizgen tekserýler nátıjesinde jalaqy bereshegi men zańbuzýshylyqtardyń myńdaǵan deregi anyqtaldy. Qabyldanǵan sharalardyń arqasynda on myńdaǵan azamattyń quqyqtary qorǵalyp, eńbekkerlerge mıllıardtaǵan teńge qaıtaryldy, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, 2025 jylǵy 1 qazandaǵy jaǵdaı boıynsha memlekettik eńbek ınspektorlary respýblıka boıynsha 391 kásiporynda 9,3 myńnan astam jumyskerge 2,2 mlrd teńgeden asa jalaqy qaryzy bar ekenin anyqtady. Sonymen qatar túrli uıymdarda júrgizilgen tekserýler barysynda eńbek quqyǵynyń 5,5 myńnan astam buzylý faktisi tirkelgen.
«Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 2 932 uıǵarym berildi jáne 370,9 mln teńgeden astam somaǵa aıyppul salyndy. Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 8,9 myń jumyskerdiń quqyqtary qorǵaldy. Olarǵa 1,8 mlrd teńge tólendi», delingen habarlamada.
Vedomstvo eńbek zańnamasynyń saqtalýyna memlekettik baqylaýdy erekshe nazarda ustap otyr. 2025 jylǵy 1 qazanǵa deıin eńbek ınspektorlary 4 572 tekserý júrgizip, 5 523 zańbuzýshylyqty anyqtaǵan. Onyń ishinde 4 590-y eńbek salasyna, 909-y eńbek qaýipsizdigi men eńbekti qorǵaýǵa, al 24-i halyqty jumyspen qamtýǵa qatysty.
Atqarylǵan jumystardyń nátıjesinde 34 myń jumyskerdiń eńbek quqyǵy qorǵalǵan.