Sý resýrstary jáne ırrıgasııa mınıstrligi Germanııanyń «German Water Partnership» (GWP) qaýymdastyǵymen Strategııalyq áriptestik týraly kelisimge qol qoıdy. Buǵan vıse-premer Qanat Bozymbaev pen GWP basshylyǵy arasynda osydan bir jyl buryn Germanııada ótken kelissózder bastama boldy.
«German Water Partnership» – Germanııanyń sý salasyndaǵy halyqaralyq qaýymdastyǵy. Ol sý resýrstary salasyndaǵy 300-den asa uıymdy biriktiredi. Qaýymdastyq músheleriniń qatarynda ýnıversıtet deńgeıindegi ınstıtýttar, qurylys kompanııalary, konsýltanttar men álemge tanymal óndirýshiler bar.
Kelisim Qazaqstanǵa sý únemdeý tehnologııalaryn engizý, ınnovasııalyq sheshimderdi paıdalaný, klımattyq qaterlerge, sý tasqyny men qýańshylyqqa qarsy tózimdilikti arttyrý, sondaı-aq mamandardy oqytý jáne daıarlaý kezinde úzdik halyqaralyq tájirıbelerdi qoldanýǵa múmkindik beredi.
Búginde Germanııa tájirıbesi sý resýrstaryn boljaý, modeldeý jáne esepke alý boıynsha sıfrlyq jobalardy júzege asyrýda qoldanylyp keledi. Nemis tehnologııalary gıdrotehnıkalyq nysandardyń qurylysy kezinde de paıdalanylyp júr.
Vıse-premer Qanat Bozymbaev pen GWP atqarýshy dırektory Borıs Graıfender yntymaqtastyqtyń keleshegin talqylady. Kezdesýde «German Water Partnership» qoldaýymen Sý resýrstary jáne ırrıgasııa mınıstrliginiń Aqparattyq-taldaý ortalyǵy bazasynda Qazaqstan-Germanııa sý ınnovasııalyq habyn qurý usynyldy.
Kelisimge qol qoıylǵan soń taraptar qujat jańa birlesken qazaqstandyq-germandyq jobalardy damytýǵa berik negiz bolatynyna senim bildirdi.