Memlekettik hatshy Gúlshara Ábdiqalyqovanyń tóraǵalyq etýimen Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti.
Basqosýda Elbasynyń «Nurly Jol – bolashaqqa bastar jol» atty Joldaýyn iske asyrý aıasynda elimiz ekonomıkasynyń ındýstrııalyq-ınnovasııalyq damýyna áıelderdiń qatysýyn arttyrý máseleleri qaraldy.
– Elbasy Nursultan Nazarbaev «Nur Otan» partııasynyń XVI sezinde aldymyzǵa birqatar mindetter júktegen bolatyn. Atap aıtqanda, bes ınstıtýttyq reformany alǵa tarta otyryp, ekonomıkalyq baǵdarlamalardy sapaly júzege asyrýdy jáne memlekettik qyzmetterdi usynýdy qamtamasyz etetin qazirgi zamanǵy, kásibı jáne avtonomııaly memlekettik apparatty qalyptastyrýdy, ekonomıkalyq ósim úshin negiz bolatyn zańnyń ústemdigin qamtamasyz etýdi, sonymen qatar, ındýstrııalandyrý jáne ártaraptandyrýǵa negizdelgen ekonomıkalyq ósimge qol jetkizýdi, bolashaǵy birtutas ult pen transparentti jáne esep berýshi memleket qurý týraly aıtqan bolatyn.
Osynyń aıasynda búgingi jıynda birshama máseleler tarqatylady, dedi Memlekettik hatshy. Sonymen qatar, G.Ábdiqalyqova áıelderdiń el ekonomıkasyndaǵy sanyn arttyrýdyń mańyzyna toqtalyp, halyqaralyq valıýta qory sarapshylarynyń pikirinshe, «Eńbek naryǵyna áıelder barynsha kóp shyqqan saıyn, álemdik IJО́ meılinshe ósetin bolady. Birqatar elderde názik jandylar ekonomıkanyń ósýin 30%-ǵa jedeldetýge qabiletti», ekendigin atap kórsetti.
Ulttyq ekonomıka, Investısııalar jáne damý mınıstrlikteriniń basshylary ózderiniń sóılegen sózderinde ındýstrııalandyrý baǵdarlamasynyń birinshi besjyldyǵynda 770 joba iske qosylǵanyn atap ótti. Bul jobalarǵa 63 myń adam tartylsa, onyń 18 myńy, ıaǵnı 29%-y áıelder.
Otyrysta sondaı-aq, memlekettik organdardyń strategııalyq josparlarynyń genderlik aspektileri, Astana, Almaty qalalary men oblystar aýmaqtaryn damytý baǵdarlamalary, Soltústik Qazaqstan oblysy ákimdiginiń óńir halqynyń reprodýktıvti densaýlyǵyn saqtaý boıynsha qoldanyp jatqan sharalary qaraldy. Ulttyq komıssııa tóraıymy Gúlshara Ábdiqalyqova halyqtyń qalypty ósýin jáne ómir sapasyn arttyrý úshin reprodýktıvti densaýlyqty saqtaý men nyǵaıtýdyń mańyzdylyǵyn atap ótti.
Elmıra MÁTIBAEVA,
«Egemen Qazaqstan».