2025 jyldyń toǵyz aıynyń qorytyndysy boıynsha memlekettik bıýdjettiń kirisi 17,3 trln teńgeni nemese jospardyń 102 paıyzyn qurady. Bul týraly Úkimet otyrysynda Qarjy mınıstri Mádı Takıev aıtty, dep habarlaıdy Egemen.kz.
2025 jyldyń 9 aıynyń qorytyndysy boıynsha memlekettik qarjy kórsetkishteri kelesideı qalyptasty.
«Memlekettik bıýdjettiń kiristeri 17,3 trln teńgeni qurap, jospardyń 102%-yn oryndady. О́tken jylmen salystyrǵanda ósim 116%, ıaǵnı 2,4 trln teńgege artqan», dedi mınıstr Úkimet otyrysynda.
Respýblıkalyq bıýdjetke túsken kirister kólemi 10,5 trln teńgeni qurap, jospar 97,3% deńgeıinde oryndaldy. Bul ótken jyldyń sáıkes kezeńimen salystyrǵanda 116%, ıaǵnı 1,4 trln teńgege kóp.
Mınıstrdiń aıtýynsha, keıbir kórsetkishterdiń tolyq oryndalmaýyna negizgi sebep — álemdik munaı baǵasynyń joǵary qubylmalylyǵy jáne geosaıası turaqsyzdyqtyń saqtalýy. Bul faktorlar bıznes úshin logıstıkalyq shyǵyndardyń artýyna áser etip, sonyń saldarynan eksport kólemi azaıyp, iri kásiporyndardan túsetin salyq túsimderi tómendegen.
«Al jergilikti bıýdjetterge kelip túsetin salyqtar syrtqy faktorlarǵa táýeldi emes, sondyqtan bul baǵytta turaqty ósim baıqalady. Túsimder kólemi 6,8 trln teńgeni qurap, jospardan 704 mlrd teńgege artyq oryndalǵan. Salyqtyq jáne kedendik ákimshilendirý aıasynda qosymsha 653 mlrd teńge kóleminde rezervter qamtamasyz etildi. 2025 jyldyń 9 aıynda eksporttaýshylarǵa QQS kólemi 1 trln teńgege jýyq qaıtarylǵan», dedi mınıstr.