«Ádiletti Qazaqstan: azamattyq qoǵam men memleket yntymaqtastyǵy» taqyrybynda elordada ótken HII Azamattyq forýmda sarapshylar mańyzdy máselelerdi talqylady. Máselen, sarapshylardyń aıtýynsha, azamattyq qoǵam Prezıdent alǵa qoıǵan parlamenttik reformanyń qalyptasýyna belsendi qatysýy qajet. Sondaı-aq jalpyulttyq máselede bul qoǵamnyń róli erekshe. Osy oraıda forým elimizde AES salý, ekologııa, sıfrlyq damý, ınklıýzııa, jastardyń bastamalaryn qoldaý sekildi máselelerdi ortaǵa saldy.
Baný NURǴAZIEVA,
Qazaqstan Azamattyq alıansynyń prezıdenti:
– Memleket basshysy jarııalaǵan Ádiletti Qazaqstan tujyrymdamasy azamattyq sektor negizgi ról atqaratyn jańa áleýmettik kelisimshartty bildiredi. Keıingi jyldary elimizde bolyp jatqan reformalar arqyly qoǵamdyq sanany ózgertý júrip jatyr. Buǵan qoǵamdyq keńester, onlaın platformalar, ombýdsmen ınstıtýty, sıfrlyq platformalar, qoǵamdyq baqylaý quraldary sekildi dıalogtiń jańa tetikteri áser etip otyr. Qazir úkimettik emes uıymdar (ÚEU) memlekettiń damýyna naqty úles qosyp keledi. Máselen, olar jumys oryndaryn quryp, ekologııalyq jáne áleýmettik ınnovasııalardy engizýge atsalysyp, ınvestısııa tartýǵa da yqpal etedi. Eýropa ǵalymdarynyń zertteýlerine sáıkes, kommersııalyq emes sektordaǵy aqyly nemese erikti jumyspen qamtý qurylys ındýstrııasymen salystyrýǵa bolatyn halyqtyń shamamen 6 paıyzyn quraıdy. Sondyqtan ÚEU-ny qoldaýǵa baǵyttalǵan barlyq kúsh-jiger jańa qyzmetter, jumys oryndary, azamattardyń senimi men belsendiligin arttyrý túrinde qaıtarylady.
Memleket ÚEU-ǵa áleýmettik kelisimsharttardy júzege asyrýshy retinde ǵana emes, sonymen qatar ıdeıalardyń, ınnovasııalardyń kózi jáne jańa sheshimderdiń draıveri retinde qaraǵany jón.
Sarango RADNAARAGChA,
Qazaqstandaǵy BUU-nyń Turaqty úılestirýshisi:
– Azamattyq qoǵam – el men qoǵamnyń damý maqsattary men mindetterine qol jetkizýde, muqııat taldanǵan ıdeıalar men tájirıbelerdi iriktep, áleýmettik kúshterdi biriktiretin eleýli kúsh. Sondaı-aq azamattyq qoǵam máseleni sheshýdiń aldyńǵy qatarynda, birinshi bolyp áreket jasap, «jumys keńistiginen» sońǵy bolyp shyǵady. Birikken Ulttar Uıymy óz tarapynan azamattyq qoǵamnyń ınklıýzıvti, ashyq ári mazmundy áreket etýin qamtamasyz etýge umtylady.
Qazaqstanda BUU men azamattyq qoǵam arasyndaǵy seriktestik adam quqyqtaryn damytý, genderlik teńdikti qoldaý, ınklıýzıvti bilim berý men erekshe qajettilikteri bar adamdarǵa qamqorlyq kórsetý, bosqyndardy qorǵaý sııaqty kóptegen salada turaqty túrde nyǵaıa tústi.
«Halyq únine qulaq asatyn memleket» tujyrymdamasy Úkimettiń azamattyq qoǵammen ózara árekettesýin nyǵaıtýǵa baǵyttalǵan. Qazaqstan Úkimeti turaqty, ınklıýzıvti qoǵam qurýǵa ÚEU-nyń úzdiksiz belsendi qatysýyn yntalandyratyn bastamalardy qoldaıdy.
Almatydaǵy BUU-nyń Ortalyq Azııa men Aýǵanstannyń ornyqty damý maqsattarynyń aımaqtyq ortalyǵy azamattyq qoǵam úshin aımaqtyq problemalar men sheshimderdi jınaý jáne talqylaýǵa qosymsha alań bola alady. Azamattyq qoǵam jaı ǵana seriktes emes, bul progrestiń qýatty quramdas bóligi, onymen yntymaqtastyqta biz barlyǵyna teń múmkindikterge negizdelgen laıyqty bolashaqty qura alamyz.
Kırıll OSIN,
«Eko-Mańǵystaý» úkimettik emes uıymynyń dırektory:
– Elimiz úshin Kaspıı teńizi jaı ǵana tabıǵı resýrs emes, ol orasan zor tarıhı jáne ekonomıkalyq mánge ıe. Ony saqtaý – ulttyq qaýipsizdik, densaýlyq, ómir sapasynyń máselesi. Muny eleýsiz qaldyrýǵa bolmaıdy. Biraq dál osyndaı syn-qaterler jańa múmkindikterge jol ashady. Máselen, Qazaqstan Kaspıı mańy elderimen odaqtastyqta sheshimder izdeýde kóshbasshylyq ról atqara alady jáne atqarýǵa mindetti. Ekologııalyq qoǵamdastyq Kaspıı teńizin saqtaýdyń halyqaralyq baǵdarlamasyn ázirleý bastamasyn quptaıdy, ony júzege asyrýǵa Kaspıı mańy memleketterin jumyldyrý qajet. Bul óz kezeginde Úkimettiń, ǵylymnyń, bıznestiń jáne azamattyq qoǵamnyń kúsh-jigerin biriktiredi.
Al atom energetıkasyna qatysty qoǵam ashyq dıalog pen qorshaǵan orta men bolashaqtyń energııasy arasynda laıyqty ymyraǵa kelýdi kútedi. «Taza Qazaqstan» da júıeli baǵdarlama retinde ázirlenip, uzaqmerzimdi ulttyq ıdeıa retinde nyǵaıýy qajet. Úkimettik emes uıymdar men ekologııalyq qozǵalystardyń belsendi qatysýynsyz elimizdegi ekologııalyq kún tártibin júzege asyrý múmkin bolmaıtynyn eskerý qajet.
Zahıra BEGALIEVA,
«ITeachMe» quzyrettilikti damytý ortalyǵy» qoǵamdyq qorynyń dırektory:
– Aldymen 2027 jyldy Múgedektigi bar adamdar úshin áleýmettik teńdik jyly etý týraly usynysymdy bildiremin. Bul bastama eldi ortaq maqsat – teńdik erekshelik emes, tájirıbege aınalatyn qoǵam qurý tóńireginde biriktire alady dep esepteımin. Qazaqstanda árbirimiz «Men ózimdi dáleldeýdiń qajeti joq, bul qoǵamda meniń ornym bar» dep aıta alatyn elge aınalýǵa qabilettimiz. Men azamattyq qoǵamda 20 jyldan asa jumys istep kelemin, olar júıeniń ózgerýin kútpeı-aq, ony ózderi ózgertedi.
Sońǵy málimetterge súıensek, elimizde 742 myńnan asa múgedektigi bar jan turady. Osy ýaqytqa deıin elimiz kóp nársege qol jetkizdi, múgedekterdiń quqyqtary týraly konvensııany ratıfıkasııalady, Áleýmettik kodeksti bekitti. Biraq bul tek nusqaýlar, múgedektigi bar adam mekemelerge ońaı kirip, onlaın qyzmetterdi ala alatyn kezde ǵana naqty ózgeris boldy dep aıta alamyz.
Abylaıhan ÁBDIRASh,
Qazaqstan «Medısına jastary» respýblıkalyq qoǵamdyq birlestiginiń tóraǵasy:
– Qazaqstan jastary el irgesin nyǵaıtyp, birtutas etý maqsatyn eńbekteri men umtylystary arqyly kórsetip keledi. Biz, jastar, ortaq úıimizdiń bolashaǵy úshin jaýaptymyz. Qazaqstannyń «Medısına jastary» – belsendi azamattardyń oń ózgeristerdiń qozǵaýshy kúshine aınalýynyń jarqyn mysaly. Memlekettiń shynaıy kúshi – árbir azamattyń jaýapkershiliginde.
Memleket basshysy atap ótkendaı, jastar – ıdeıanyń, kúsh-qýattyń, jańarýdyń qaınar kózi. Elimizdegi oryn alyp jatqan reformalarǵa úlesimizdi qosýǵa árqashan daıynbyz.
Irına SÝLIMENKO,
Qazaqstandyq aqparattyq tehnologııalar jáne ınnovasııalar qaýymdastyǵynyń prezıdenti:
– Elimizdi joǵary tehnologııalyq elge aınaldyrý árbir otandasymyzdy tolǵandyratynyna senimdimin. Biz qazirdiń ózinde sıfrlyq ekojúıede ómir súrip jatyrmyz jáne onyń shyn máninde azamattyq – ashyq, jaýapty ári qoǵamdyq ıgilikke baǵyttalǵan bolýy mańyzdy.
Búginde elimiz sıfrlandyrýdyń eń joǵary deńgeıleriniń birine ıe. Biraq bastysy – iske asyrý jyldamdyǵy emes, paıdalaný mádenıeti. Tehnologııa adamdar oǵan sengende ǵana jumys isteıdi. Jasandy ıntellektiniń áleýeti zor, árıne, eger biz ony adamnyń bastamasyn aýystyrmaı, kúsheıtetin salalarǵa baǵyttasaq, áleýmettik baqylaý men yntymaqtastyq quralyna aınalýy múmkin. Azamattyq qoǵam sanaly túrde jasandy ıntellektini qabyldasa, sıfrlandyrý reformasy damýǵa baǵyttalǵan qozǵalysqa aınalady.
Daıyndaǵan –
Gúlnar JOLJAN,
«Egemen Qazaqstan»