Prezıdent Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda júktelgen mindetterge sáıkes elimizde bilim berý júıesin jańǵyrtý jumystary qarqyndy júrip jatyr. Memleket mektepke deıingi tárbıeden bastap joǵary bilim men ǵylymǵa deıingi barlyq býynnyń sapasyn arttyrýǵa baǵyttalǵan aýqymdy reformalardy qolǵa aldy, dep habarlaıdy Egemen.kz.
Bıylǵy jyldan bastap elimizde bilim berý salasynda aıtarlyqtaı serpilis baıqalady. Mektepke deıingi tárbıe baǵytynda 26,6 myń orynǵa arnalǵan 303 jańa balabaqsha ashylyp, búldirshinderge qolaıly jaǵdaı jasaldy. Áleýmettik turǵydan az qamtylǵan otbasylardyń balalary tegin tamaqpen qamtamasyz etilip otyr. Sondaı-aq, ata-analarǵa arnalǵan 5,5 myńnan astam keńes berý ortalyǵy jumys isteıdi.
Jańashyl tetikterdiń biri – «Aqsha balanyń sońynan júredi» qaǵıdatyna negizdelgen vaýcherlik qarjylandyrý júıesi. Qazirgi tańda bul joba 20 qala men 7 aýdanda synaqtan ótip, 4,8 myńǵa jýyq balabaqsha qatysyp otyr. 671 myńnan astam vaýcher berilip, sonyń nátıjesinde balabaqshaǵa kezek eki esege jýyq qysqarǵan.
Orta bilim salasynda da tyń jobalar júzege asyp jatyr. 2024–2025 jyldary respýblıka boıynsha 359 jańa mektep paıdalanýǵa berildi. Onyń ishinde «Keleshek mektepteri» jobasy aıasynda 173 bilim ordasy ashyldy. Bıyldyń ózinde 102 mektep salynyp, jyl sońyna deıin taǵy 92 nysannyń qurylysy aıaqtalady dep josparlanǵan. Sonymen qatar, 245 mektepte kúrdeli jóndeý júrgizilip, 95 myńnan astam oqýshynyń oqýyna qolaıly orta qalyptasady.
Sonymen qatar 2025 jyldyń alǵashqy toǵyz aıynda balalardy qosymsha bilimmen qamtý kórsetkishi 87,2 %-ǵa jetken. Oqýshylardyń 62 %-y tegin úıirmeler men seksııalarǵa qatysqan, bul ótken jylmen salystyrǵanda 10 %-ǵa joǵary. Qosymsha bilim berý uıymdarynyń sany da artyp, qazirgi tańda olardyń jalpy sany eki myńnan asty.
Sonymen qatar, birneshe qalada úıirmeler men seksııalarǵa jazylýdy jeńildetetin pılottyq sıfrlyq joba júzege asyrylyp jatyr.