Serbııanyń Novı Sad qalasynda kúres túrlerinen 23 jasqa deıingi balýandar arasyndaǵy álem chempıonaty (U-23) aıaqtaldy. Jarysty elimizdiń quramasy bes júldemen qorytyndylady.
Grek-rım kúresinen ótken jarysta jerlesterimiz úsh júldege qol jetkizdi. Solardyń arasynda Iýsýp Masıev tabysty óner kórsetti. 97 kg salmaqta aıqasqan astanalyq apaıtós japonııalyq Kıo Kıtavakı, armenııalyq Arshak Geghamııan, reseılik Maksım Averındi jeńip, bas júldege talasý múmkindigine ıe boldy. Biraq sheshýshi tusta álem chempıony (U-20) ýkraınalyq Egor Iаkýshenkony eńsere almady. Sóıtip, Iý.Masıev kúmis medaldi qanaǵat tutty.
72 kg salmaq dárejesinde kúsh synasqan Mereı Máýletqanov alǵashqy aınalymdarda bolgarııalyq Sergeı Stoev pen túrkııalyq Eren Ulqýdy oısyrata utqanymen, jartylaı fınalda ózbek Abror Ataevtan aılasyn asyra almady. Úshinshi oryn úshin beldesýde Reseı ókili Danııl Grıgorevtiń tas-talqanyn shyǵaryp, qolaǵa qol jetkizdi.
82 kg salmaqtaǵy Omar Sataev ta sol mejeden kórindi. Bastapqy básekelerde mysyrlyq Abolfazı Mohmedı men meksıkalyq Dıego Toresti tize búktirgen otandasymyz shırek fınalda jastar arasyndaǵy álemniń eki dúrkin chempıony, moldovalyq Aleksandr Gýtýǵa jol berdi. Odan keıin Omar japonııalyq Reon Kakegva men belgııalyq Ibragım Tabaevtyń osal tusyn ońaı tapty.
Jeńis tuǵyryna kóterilýge Erasyl Mamyrbekovtiń (55 kg) de múmkindigi boldy. Bastapqy básekelerde barlyq básekelesinen basym túsken ol jartylaı fınalda reseılik Álibek Ámirovke jol berdi. Odan keıin úshinshi oryn úshin tartysta úndistandyq Vıshvajıt Moreden jeńildi. Ishar Qurbaev (60 kg), Nurdáýlet Qapas (63 kg), Baǵdat Sabaz (67 kg), Nurasyl Amanáli (77 kg), Maqsat Saılaý (87 kg), Johar Ýzarov (130 kg) úshin Serbııa sapary sátsiz aıaqtaldy.
Grek-rım kúresinen álem chempıondary: 55 kg – Elmır Álıev (Ázerbaıjan), 60 kg – Koto Gomı (Japonııa), 63 kg – Zııa Babashov (Ýkraına), 67 kg – Muhamed Ábdelrahım (Mysyr), 72 kg – Hosseın Mohamedı (Iran), 77 kg – Irfan Mırzoev (Ýkraına), 82 kg – Aleksandr Gýtý (Moldova), 87 kg – Cholamreza Djavad Farýhısendjanı (Iran), 97 kg – Egor Iаkýshenko (Ýkraına), 130 kg – Farıd Shaban Hedaıatı (Iran).
Byltyr Tıranada jalaýy jelbiregen jarysta jeńis tuǵyryna synyq súıem qalǵanda súringen Laýra Ǵanıqyzy (50 kg), Zeınep Baıanova (53 kg), Alına Ertóstik (76 kg) osy joly jeńis tuǵyryna kóteriletin shyǵar dep úmittendik. Osydan tórt jyl buryn dúnıejúzilik dodada dara shyqqan Nılýfar Raımovaǵa (57 kg) da aıryqsha senim artyldy. Biraq bıylǵy dodada olar tym nashar kúresti. Nılýfar úndistandyq Neha Sharmadan utyldy. Zeınep jubanysh beldesýinde reseılik Vıktorııa Volkqa ese jiberdi. Sol sekildi talaı iri dúrmekte ysylǵan Vıktorııa Hýsaınovadan (65 kg) da qaıyr bolmady. Shırek fınalda ol ázerbaıjandyq Hıýnaı Qurbanovadan jeńildi.
Senim artqan sulýlarymyz birinen keıin biri utylyp jatqanda esimi kópshilikke beımálim Shuǵyla О́mirbek jarq etti. Buǵan deıin kóp kózge túspegen qazaq qyzy sheberliktiń shynaıy úlgisin kórsetti. 55 kg salmaqta saıysqa túsken ol álem birinshiliginiń (U-23) kúmis júldegeri, moldovalyq Mıhaıla Samoıl, kadetterdiń álem birinshiliginiń fınalısi, rýmynııalyq Aleksandra Voıýkeleský, Eýropa chempıony (U-20), germanııalyq Amorı Andrıchtiń aıaǵyn kókten keltirdi. Fınalda túrkııalyq Týba Demırmen aıqasty. Bul beldesýde Shuǵyla óziniń jankeshtiligi men tabandylyǵynyń arqasynda azýly qarsylasynyń ýysynan jeńisti julyp áketti. Sóıtip, Shuǵyla О́mirbektiń esimi U-23 jarysynda aldyna jan salmaı, álem chempıony atanǵan qazaqtyń tuńǵysh burymdy balýany retinde tarıhqa jazyldy.
Áıelder kúresinen álem chempıondary: 50 kg – Jýnlý Lıan (Qytaı), 53 kg – Harýna Marıkava (Japonııa) , 55 kg – Shuǵyla О́mirbek (Qazaqstan), 57 kg – Akarı Fýdjınamı (Japonııa), 59 kg – Rýka Natamı (Japonııa), 62 kg – Sakýra Matokı (Japonııa), 65 kg – Elızaveta Petlıakova (Reseı), 68 kg – Nesrın Bas (Túrkııa), 72 kg – Nurzat Nurtaeva (Qyrǵyzstan), 76 kg – Kaıl Rene Ýılker (AQSh).
Erkin kúres sheberleri saıysynda tek 2024 jylǵy álem chempıony Rızabek Aıtmuhannyń ǵana jeńis tuǵyryna kóterilýge kúsh-jigeri jetti. 97 kg salmaqta saıysqa túsken ol bastapqy básekelerde túrkııalyq Ibragım Beneklı, ıspanııalyq Aımar Egýınoa, amerıkalyq Garavýs Koýekabahılahony merziminen buryn utty. Jartylaı fınalda álem chempıonatynyń qola júldegeri, Azııanyń eki dúrkin chempıony, japon Arash Ioshıdamen qıysty. Dál osy balýannan bizdiń jigit sońǵy eki mańyzdy jarysta utylǵan edi. Bul joly da Ioshıda óziniń myqtylyǵyn moıyndatyp, qandasymyzǵa bir de upaı bermedi. Qola medal úshin saıysta Rızabek álem chempıony (U-20), ırandyq Abdolfazal Babalodan basym tústi.
О́kinishke qaraı, ózge jerlesterimiz senim úddesinen shyǵa almady. Djahongır Ahmadjanov (57 kg), Mereı Bazarbaev (61 kg), Dıas Saǵatov (74 kg), Aıbek Aıtbekov (92 kg), Baýyrjan Sovetov (125 kg) tusaýkeser kezdesýlerinde súrindi. Mahambet Mámbetov (86 kg) ekinshi kezeńde jeńilistiń kermek dámin tatty. Jarysty sátti bastaǵan Rústem Tólendi (65 kg) shırek fınalda qyrǵyzstandyq Bılol Sháripuly shań qaptyryp ketti. Osy mejede Maıs Álıev (70 kg) ırandyq Sına Mahdı Halılıge, Erhan Ábil (79 kg) reseılik Nıkıta Maevskııge ese jiberdi.
Erkin kúresten álem chempıondary: 57 kg – Lıýk Lıllendal (AQSh), 61 kg – Djeksen Forrest (AQSh) , 65 kg – Sýnjıt Sýnjıt (Úndistan), 70 kg – Henan Heıbatov (Ázerbaıjan), 74 kg – Oýen Mesenbrınk (AQSh), 79 kg – Levı Heınes (AQSh), 86 kg – Arsen Baloıan (Reseı), 92 kg – Mohamadmodın Azımı (Iran), 97 kg – Arash Ioshıda (Japonııa), 125 kg – Abdolfazl Nejad (Iran).