Kórnekti maıdanger jazýshy Kemel Toqaev atyndaǵy dástúrli detektıv shyǵarmalar baıqaýy 2018 jyldan beri turaqty ótip keledi. «Zań medıa» korporasııasy qolǵa alǵan baıqaýdyń qorytyndy is-sharasy sońǵy jyldary elimizdiń ár qalasynda uıymdastyrylyp júrgenin kópshilik biledi. Bıyl ádebı baıqaýdyń úzdikteri Taraz tórinde anyqtaldy.
«Zań medıa» korporasııasynyń dırektory, belgili jýrnalıst Dosymbek О́teǵalıdiń aıtýynsha, osy jylǵy baıqaýǵa úsh aı bederinde elimizdiń ár qıyrynan 72 avtordan shyǵarmalar kelip túsken. Olardyń arasynan iriktelip alynǵan týyndylar qazylar alqasynyń qaraýyna usynylǵan. Jalpy, dástúrli baıqaýǵa qatysýshylar sany jyl ótken saıyn arta túsken.
«Baıqaýdyń negizgi maqsaty – salalyq kórkem ádebıetti damytý, ulttyq detektıv janrynyń negizin qalaǵan Kemel Toqaev murasyn urpaq jadynda jańǵyrtý. Keıingi jyldary osy janrda qalam silteıtin jazýshylar qatary arta túskenin baıqap, qýanyp otyrmyz.
Jambyl óńiri osy jyly «Áýlıeata – kitap oqıtyn óńir» jobasyn qolǵa alǵany málim. Sol turǵydan alǵanda bizdiń baıqaýymyz ben Jambyl jerindegi joba arasynda úılesim bar dep paıymdaımyz. Ádebı baıqaýǵa barynsha qoldaý bildirgen óńir basshysy Erbol Qarashókeevke, oblystyq sot pen ózge de quqyq qorǵaý organdarynyń azamattaryna aıtar alǵysym sheksiz», deıdi D.О́teǵalı.
Marapattaý rásiminde sóz sóılegen oblys ákiminiń orynbasary Serik Sálemov Kemel Toqaevtyń ult ádebıetindegi orny men taǵylymǵa toly týyndylary qaı kezde de jastardyń, jalpy oqyrman qaýymnyń nazarynan tys qalmaıtynyn tilge tıek etti.
Senator Nurtóre Júsip, belgili jýrnalıst Serik Ábikenuly bastaǵan qazylar alqasy baıqaýǵa túsken shyǵarmalardy jan-jaqty zerdelep, jazýshylardyń shytyrman oqıǵalardy sheberlikpen jetkize bilýine aıryqsha den qoıypty. S.Ábikenulynyń aıtýynsha, qatysýshy qalamgerler burnaǵy jyldarǵa qaraǵanda kásibı turǵyda ósken kórinedi. Ony shyǵarmalardaǵy sıýjettiń kórkemdik deńgeıinen baıqaýǵa bolady.
Baıqaý qorytyndysynda «Mylqaý tún» týyndysy úshin almatylyq Gúlden Jylkeldıeva bas júldege (1,5 mln teńge) laıyq dep tanylsa, Birinshi oryn (1 mln teńge) «Qıys jol» shyǵarmasy úshin jambyldyq Aızada Kenjemoldaevaǵa buıyrdy. Eki ekinshi oryn Aldajar Ábilov pen Bolaı Berdıevaǵa (árqaısysyna 750 myń teńge), úsh úshinshi oryndy (árqaısysyna 500 myń teńge) Mıras Muqash, Shernııaz Jalǵasbekuly jáne Baqyt Jálıeva ıelendi. Sondaı-aq birneshe qalamgerge 300 myń teńge kóleminde yntalandyrý syıaqysy jáne oblystyq sottyń arnaıy syılyǵy tabystaldy.
TARAZ