Qazaqtyń áıgili kásipqoı boksshysy, IBF pen WBO nusqalary boıynsha orta salmaqtaǵy álem chempıony Jánibek Álimhanuly kelesi jekpe-jegin 6 jeltoqsanda AQSh-tyń San-Antonıo qalasynda ótkizedi. Bul básekeni ataqty «Premier Boxing Champions» promoýterlik kompanııasy uıymdastyryp otyr.
«Qazaq Style» laqap atyn ıelengen Jánibek kýbalyq 42 jastaǵy Erıslandı Laramen kúsh synasady. Gýantanamo týmasy 2005 jyly Qytaıdyń Mınıan qalasynda áýesqoılar arasynda álem chempıony atanǵan. Sol jarystyń jartylaı fınalynda bizdiń Baqtııar Artaevtan basym túsken. Kezinde túrli týrnırlerde Baqyt Sársekbaevpen eki ret joly qıysyp, ekeýinde de qandasymyz jeńiske jetti. 2007 jyly Lara Brazılııada ótken Panamerıka oıyndary barysynda shetelge qashpaq boldy. Biraq jergilikti saqshylardyń qolyna túsken kýbalyq qabylan otanyna qaıtaryldy. 2008 jyly sol áreketin ekinshi márte qaıtalady. Bul joly astyrtyn jospary júzege asyp, Germanııadan bir-aq shyqty. Odan keıin Amerıkaǵa attandy.
Kásipqoı rıngtegi tusaýkeser kezdesýin Lara 2008 jyldyń jazynda ótkizdi. Sol kezden beri 36 márte sharshy alańǵa kóterilip, 30 básekede jeńiske jetti. 18 qarsylasyn nokaýtqa jiberdi. 2011 jyly Pol Ýılıamsten, 2014 jyly Saýl Alvaresten, 2018 jyly Djerrett Hertdtan upaı sanymen ǵana utyldy. 2011 jyly Karlos Amado Molına, 2012 jyly Vanes Martırosıan, 2019 jyly Braıan Kostanoǵa qarsy ótken jekpe-jekterde teń esep tirkeldi. Qazirde Erıslandı WBA nusqasy boıynsha chempıondyq belbeýge ıe.
Jánibek Álimhanulynyń júrip ótken joly jankúıerlerdiń kóz aldynda. 32 jastaǵy Jánibek kásipqoı boksty serik etken toǵyz jyl aralyǵynda 17 ret rıngke kóterilip, barlyq básekede jeńis toıyn toılady. 12 qarsylasyn esinen tandyrdy. Qazir «Qazaq Style» eki birdeı bedeldi nusqa boıynsha chempıondyq ataqty ıelenip otyr. Endi úshinshi nusqany da enshilese degen izgi tilegimiz bar.