El ishinde adal eńbegimen daralanyp, jyldar boıy jıǵan tájirıbesin keıingi tolqyn jastarmen bólisip júrgen azamattar barshylyq. Tóńiregi temir jonýshy retinde tanyǵan Ǵalymjan Súgirálıev jasy alpystan assa da, temirden túıin túıip júr. О́z isiniń bilgiri atanǵan azamatty aınalasyndaǵylar abzal aǵa, bilikti maman retinde qurmetteıdi.
Ǵ.Súgirálıev Merki aýdanyndaǵy kásiptik kolledjde stýdentterge sabaq beredi. Ol som temirdi qıystyryp qana qoımaıdy. Sánin keltirip dánekerleıdi, tipti birneshe qurastyrmaly qurylǵylardyń da avtory atanyp úlgeripti. Aptal azamat keıingi tolqyn inileriniń osy mamandyqty bir kisideı meńgergenin qalaıdy. Sodan da bolsa kerek, bar bilgenin shákirtterine ynta-shyntasymen úıretip jatady.
«Ár adam óz jumysyn janyndaı jaqsy kórýi kerek. О́z basym qandaı da bir jobany qolǵa alǵanda basqa sharýanyń bárin umytyp ketemin. О́ıtkeni istep jatqan jumysty barynsha sapaly oryndaý qajet. Oǵan jyldar boıy jınaǵan tájirıbe azdyq etedi. Jan júregińmen sezinip, jan-tánińmen berilip jumys istegende ǵana oıǵa alǵań jobań aıtarlyqtaı sátti shyǵady. Eń birinshi kezekte temir jonýshy syzbany jazbaı tanýy, sezinýi kerek. О́ıtkeni ol – basty qujat. Qujattaǵy syzbadan eshqashan aýytqýǵa bolmaıdy. Sál qıys kesseń, atqarǵan jumysyń tekke ketedi. Bárin qaıta bastaýǵa týra keledi. Sondyqtan da barlyq jumysqa baıyptylyqpen, salqynqandylyqpen qaraǵan abzal. Jeti ret ólshep, bir ret kesken adam eshqashan eshteńeden utylmaıdy. О́mirlik tájirıbemde osyny anyq túsindim. Keıingi jastardyń muny eshqashan qaperden shyǵarmaǵany jón», deıdi maman.
Bar sharýa stýdentterge dáris oqýmen bitpeıdi. Olar temirden túıin túıýdiń qyr-syryn tereńirek meńgergisi keledi. Sol turǵyda Ǵ.Súgirálıevtiń sheberhanasyna baryp, teorııany tájirıbemen ushtastyrýǵa den qoıatyndar da jetkilikti. О́z aýlasy mańynan sheberhana ashyp alǵan Ǵ. Súgirálıev jyldar boıy jınaǵan bilimin shákirtteriniń boıyna darytýdan esh jalyqqan emes. Qaıta adal eńbekpen nápaqa tapqysy keletin jastardyń talabyna dán rıza.
«Shyn sheberdiń dárisin tyńdaý men tájirıbesine tereń boılaýdyń óz artyqshylyǵy bar. Ol kisi bizge temirdiń san túrin jiktep, taldap aıtyp otyrady. Sol temirmen qalaı jumys isteý kerektigin úıretip júr. Biz de qoldan kelgenshe úırenip jatyrmyz. Ázirge bilgenimiz asa kóp emes. Sondyqtan da biz meńgerýge tıis dúnıe áli de jetkilikti. Bilikti mamannan tálim alyp júrgenimizdi qaı kezde de maqtan tutamyz. О́ıtkeni bul kisi ózi tereń izdenip qana qoımaı, shákirtterin de eńbekqorlyqqa, tózimdilikke baýlyp júr. О́z isiniń bilgirinen alǵan bilimimiz bolashaqta kádege jaraıtynyna senim mol. Aldyńǵy tolqynnyń iskerligi, ómirlik tájirıbesi, jumysqa asqan jaýapkershilikpen qaraıtyn qasıeti – bizge úlgi. Jaýapkershilik bar jerde jumys alǵa jyljıdy, naqty nátıje shyǵady», deıdi Ǵalekeńniń shákirti Baıram Baıramov.
Qaı kezde de jańashyldyqqa umtylǵan maman qazirgi kezde eski traktordy jónge keltirip, egis dánine arnalǵan arnaıy elek qurastyryp jatyr. Tuqym tazalaıtyn qurylǵy qozǵaltqyshyn kir jýatyn mashına motorynan ázirlepti.
«Eńbek adam balasyn tárbıeleıdi. Sondyqtan da jastar temirden qaımyqpaýy kerek. Qaıta onyń syryna tereńirek qanyǵyp, jańa dúnıelerdi jasaýǵa tyrysqan abzal. Sonda ǵana qolǵa alǵan isiń ónedi, kóńilden shyǵady. Adam shabytpen jumys istegende ǵana oıdaǵydaı nátıjege qol jetkizedi. Keıingi tolqyn osyny jete túsingeni jón», deıdi ol.
О́z jumysyn janyndaı súıgen azamattyń eńbekqorlyǵy tánti etpeı qoımaıdy. Temir jonýdyń qyr-syryn tolyq meńgergen mamannyń keıingi urpaqqa bereri mol. Osyny túsingen jastardyń bul mamandyqty ıgerýge degen talpynysy kóńil toǵaıtady.
Jambyl oblysy,
Merki aýdany