Ulytaý oblysynan Prezıdenttik jastar kadr rezervine qabyldanǵan Almagúl Ánýarbekovaǵa oblys ákimi Dastan Ryspekovtiń atynan arnaıy quttyqtaý tabys etildi. Quttyqtaý hatty ákim apparatynyń basshysy Keńgirbaı Smaǵulov tapsyrdy, dep habarlaıdy Egemen.kz.
«Men de Prezıdenttiń jastar kadr rezerviniń múshesi retinde osy jaýapty ári baǵyty aıqyn jolmen júrip kelemin. Memleket basshysynyń bul bastamasy jas býynǵa senim artyp, basqarý isine jańa serpin berýdi kózdeıdi. Sol senimdi aqtap, óńirimizdiń atyn abyroımen tanytatynyńyzǵa senemin», delingen oblys ákiminiń quttyqtaýynda.
2025 jylǵa arnalǵan rezerv quramyna engen Almagúl Baýyrjanqyzy «Agroónerkásiptik keshen jáne qorshaǵan ortany qorǵaý» baǵyty boıynsha irikteýden súrinbeı ótip, úzdikter qatarynan tabyldy. Eńbek jolyn 2019 jyly Jezqazǵan qalasyndaǵy №24 mektepte hımııa páni muǵalimi bolyp bastaǵan. Qazir №24 mektep dırektorynyń tárbıe isi jónindegi orynbasary.
A. Ánýarbekova aımaqtyq olımpıada men ǵylymı baıqaýdyń saraptamalyq komıssııa múshesi, ekologııalyq baǵyttaǵy ǵylymı jobalar jetekshisi. Respýblıkalyq deńgeıdegi ekologııalyq joba baıqaýlarynyń jeńimpazy. Sonymen qatar halyqaralyq NXplorers jáne CLIL bilim berý baǵdarlamalarynyń sertıfıkatyn alǵan jattyqtyrýshy.
Ulytaý oblysy