Búginde ár azamat óz bolashaǵyn qamtamasyz etýdiń jańa joldaryn izdeıdi. Keıbiri jınaq shottaryn ashsa, endi biri qosymsha tabys kózderin qarastyrady. Osy turǵyda ınvestısııalaý – qarajatty kóbeıtýdiń zamanaýı ári senimdi tásiline aınalyp keledi. Bul aqshańyzdy ár túrli qarjy quraldaryna ornalastyrý arqyly kapıtaldy arttyrýdyń tıimdi ádisi. Iаǵnı qarajat endi siz úshin jumys isteı bastaıdy. Alaıda bastapqy qadamda jıi kezdesetin qatelikterden saqtanyp, naryqtyń qaýip-qaterlerin bilý mańyzdy. Osy oraıda Fingramota.kz saıtyna súıenip, ınvestısııalaýdyń qyr-syryna úńilip kórdik, dep jazady Egemen.kz.
Investısııalaý paıda tabý nemese aktıvterdiń qunyn arttyrý maqsatynda júzege asady. Muny eki jolmen bastaýǵa bolady: kásibı broker arqyly shot ashyp, óz betimen sheshim qabyldaý nemese ınvestısııalyq paı qorynyń paılaryn satyp alyp, qarajatty basqarýdy kompanııaǵa tapsyrý.
Brokerlik qyzmetterdi tek Qarjy naryǵyn retteý jáne damytý agenttiginiń (QNRDA) lısenzııasy bar uıymdar usyna alady. Bul ınvestordyń quqyqtyq turǵydan qorǵalýyn qamtamasyz etedi. Resmı tizim www.gov.kz saıtynda jarııalanǵan. Al lısenzııasy joq kompanııalarmen árekettesý azamattardy táýekelge uryndyrady. «Qysqa merzimde joǵary kiris» ýádesi – kóbine alaıaqtyqtyń belgisi.
Búginde Qazaqstanda brokerlik shottar sany 4 mıllıonnan asty. Bul halyqtyń qarjy naryǵyna degen qyzyǵýshylyǵy artqanyn kórsetedi. QNRDA azamattardyń quqyqtaryn qorǵaý jáne ashyqtyqty arttyrý baǵytynda júıeli sharalar atqaryp jatyr.
Birinshiden, brokerler ár klıenttiń táýekel-beıinin baǵalaýǵa mindetti. Investorlar «bilikti» jáne «biliktiligi joq» sanattarǵa bólinedi. Kásibı sertıfıkaty bar nemese zańmen belgilengen aktıv ıeleri keńeıtilgen qarjy quraldaryna qol jetkize alady.
Ekinshiden, agenttik baǵaly qaǵazdar naryǵyndaǵy aıla-sharǵy men jasandy baǵa belgileýge qarsy turaqty monıtorıng júrgizedi. Mysaly, aksııa qunyn ádeıi kóterý nemese jalǵan aqparat taratý sekildi áreketter úshin ákimshilik jaýapkershilik qarastyrylǵan.
Úshinshiden, lısenzııasy joq deldaldarmen kúres kúsheıtildi. Bul – azamattardy «kepildi tabys» ýáde etetin jalǵan onlaın-platformalar men qarjy pıramıdalarynan qorǵaýdyń mańyzdy tetigi.
Mamandardyń aıtýynsha, qarjylyq saýat pen ınvestısııalyq mádenıet el ekonomıkasynyń turaqtylyǵyna da, jeke ál-aýqatqa da áser etedi.
«Ár azamat naryq tetikterin durys túsinip, sheshimin sanaly qabyldasa, qarjy júıesi de berik bola túsedi», deıdi sarapshylar.