ASTANA. 21 naýryz. Prezıdenttiń Jarlyǵymen birqatar óńirlerde sot mekemeleri quryldy. Bul týraly Joǵarǵy sottyń baspasóz qyzmeti habarlady.
Habarlamada kórsetilgendeı, Almaty jáne Shymkent qalalarynyń jańa ákimshilik-aýmaqtyq bólimshelerinde tıisinshe, Naýryzbaı jáne Qarataý aýdandyq sottary quryldy. Budan bólek, Almaty qalasynyń aýmaǵynda Medeý aýdanynyń № 2 qylmystyq is jónindegi mamandandyrylǵan aýdandyq sot qatarǵa qosyldy. Tájirıbege súıensek, mamandandyrylǵan sottar júıesin engizý ádil sheshim shyǵarýǵa jáne sot isteriniń sapaly qarastyrylýyna septigin tıgizedi.
Sondaı-aq, Prezıdent Jarlyǵyna sáıkes, Aqmola oblysyndaǵy Jaqsy aýdanynyń № 2 soty jáne Qostanaı oblysyndaǵy Rýdnyı qalasynyń № 2 soty taratyldy. Atalǵan sottar qyzmeti mundaǵy halyq tyǵyzdyǵynyń tómendigine, jumystyń azdyǵyna baılanysty toqtatyldy. Endi olardyń mindetindegi barlyq máseleler Aqmola oblysyndaǵy Jaqsy aýdandyq soty men Qostanaı oblysyndaǵy Rýdnyı qalalyq sotynyń quzyretine berildi. Bul sharalar azamattardyń sottarǵa júginge qolaılylyqty qamtamasyz etýge baǵyttalǵan jáne Aqmola men Qostanaı oblystarynyń aýmaǵynda sot tóreligin júzege asyrý boıynsha qyzmet kórsetýge shekteý bolmaıdy. Munyń barlyǵy aldyn-ala jergilikti atqarýshy organdarmen kelisilgen.
Joldybaı Bazar.
Derek, sýret: Joǵarǵy sottyń baspasóz qyzmeti.