«Egemen Qazaqstan» gazetiniń bıylǵy 23 mamyr kúngi №95 (31075) sanynda «Orasan oıdyń Oljasy nemese bir dana kitap týraly» atty maqala jaryq kórgen edi. Atalǵan jarııalanymda Oljas Súleımenov týraly tanymdyq kitaptyń bar bolǵany bir danamen jaryq kórgeni jazylǵan bolatyn.
«Orasan oıdyń Oljasy» atty bul kitapqa Halyq jazýshysy, Qazaqstannyń Eńbek Eri, Memlekettik syılyqtyń laýreaty, klassık aqyn Oljas Súleımenovtiń shyǵarmashylyǵy men qaıratkerligine qatysty belgili aqyn-jazýshylardyń, ádebıet zertteýshilerdiń jazǵan eńbekteri toptastyrylǵan. Qaısar aqynnyń bolmysyn kópke tanytatyn qundy eńbekti qazaqtyń aımańdaı aqyn qyzy, belgili ǵalym Janat Áskerbekqyzy men «Egemen Qazaqstan» gazetiniń Áleýmet jáne sport bóliminiń meńgerýshisi Jomart Ospan qurastyrǵan.
Oljas Súleımenov óleńderin orys tilinde jazǵanymen, ulttyń rýhyn álemge tanytty. Iýrıı Gagarın ǵaryshqa ushqanda aqynnyń qalamynan týǵan «Adamǵa tabyn, Jer, endi!» poemasy dúnıeni dúr silkindirdi. Tiltanýshy ǵalym retinde kóne túrki tilin zerttep, Batys ǵalymdarynyń qasań teorııalaryna soqqy berdi. Oljas Súleımenovtiń «AZıIа» kitabyna «ultshyldyq», «pantıýrkızm» sııaqty aıyptar taǵylyp, 8 jyl boıy jaryq kórmeýi, 1986 jylǵy Jeltoqsan kóterilisi kezinde aqyndy jastardyń izdeýi aqyn tulǵasynyń ult úshin asqaq ekeniniń aıǵaǵy.
Osyndaı tulǵa týraly Ábish Kekilbaevtyń «Jyr mereıi», Saıyn Muratbekovtiń «Halqyn asqaqtatqan aqyn», Myrzataı Joldasbekovtiń «Eliniń elshisi, ultynyń uıaty», Murat Áýezovtiń «Máńgilik demi – táńirdiń lebi», Nurlan Orazalınniń «Prometeıtekti tulǵa», Tursyn Jurtbaıdyń «Ultynyń kók semseri», Asqar Egeýbaevtyń «Ǵarysh poezııasy», Saýytbek Abdrahmanovtyń «Er», Seıdahmet Quttyqadamnyń «Oljas fenomeni nemese rýh quıyny», Darhan Qydyráliniń «Bilge aqyn» syndy qyryqqa jýyq qalamgerdiń tanymdyq esseleri men suhbattary engen eńbekti avtorlar túrli baspaǵa usynǵanymen, ókinishke qaraı, kitapty basyp shyǵarýǵa yntaly janashyr azamattar tabylmaǵan.
Qanshama arhıv aqtaryp, ter tógip eńbektengen avtorlar Oljastaı aqynnyń bekzat bolmysy men azamattyq asqaq tulǵasyn jan-jaqty tanytatyn kitapty bir danamen shyǵaryp, ol týraly el gazeti «Egemenge» maqala jarııalaǵan edi. Bul materıal sol sátinde oqyrman tarapynan rezonans týǵyzyp, redaksııamyzǵa birneshe azamat habarlasty. Solardyń biri belgili jýrnalıst, «Egemen Qazaqstan» gazetiniń burynǵy bas redaktory Janbolat Aýpbaev bilek sybana iske kirisip, kitaptyń qalyń oqyrmanǵa jetýine baryn salǵan.
– «Orasan oıdyń Oljasy» atty kitap qurastyryp shyqqan soń, birqatar azamatqa, aqyn-jazýshy aǵalarymyzǵa kórsettik. Túrli baspaǵa usynyp ta kórdik. Biraq kóp azamat talabymyzdy quptaǵanmen, basyp shyǵarýǵa yntaly bola qoımady. Árkimnen qarjy surap, suramsaqtaný yńǵaısyz bolǵandyqtan, óz qarjymyzǵa bir dana kitap shyǵaryp, gazetke maqala jazdyq. Materıal jarııalanysymen talaı azamat habarlasyp, janashyrlyq tanytty. Solardyń biri – qalamger Janbolat Aýpbaev aǵamyz. Ol kisi «Úsh qııan» baspasynyń dırektory Mahmut Qosmámbetovke qolqa salyp, «Orasan oıdyń Oljasy» atty kitabymyzdyń oqyrmanǵa mol taralymmen jetýine jol ashyp berdi, – deıdi eńbektiń avtory Jomart Ospan. Osylaı gazetimizde jarııalanǵan maqala bir dana taralymmen shyqqan kitaptyń kókjıegin keńitip otyr.
Bir aıta keterligi, jınaq memlekettik tapsyryspen jaryq kórmegennen keıin elimizdegi kitaphanalarǵa jetpeıtini anyq. Aldaǵy ýaqytta tıisti, jaýapty oryndar ynta-yqylas tanytyp, «oljastaný» baǵytyndaǵy qundy eńbekti elimizdiń búkil kitaphanalaryna taratatyndaı múmkindik týǵyzsa quba-qup bolar edi.