Qazaqstannyń Syrtqy ister mınıstrligi elimizdiń Avraam kelisimderine qosylýy týraly sheshim qabyldanǵanyn habarlady, dep jazady Egemen.kz vedomstvonyń baspasóz qyzmetine silteme jasap.
Mınıstrlik atap ótkendeı, bul mańyzdy sheshim tek Qazaqstannyń ulttyq múddelerin basshylyqqa ala otyryp qabyldanǵan jáne respýblıkanyń teńgerimdi, syndarly ári beıbitsúıgish syrtqy saıasatynyń sıpatyna tolyq sáıkes keledi.
«Avraam kelisimderine qosylý bizdiń elimizdiń barlyq múddeli memlekettermen yntymaqtastyǵyn nyǵaıtýǵa yqpal etedi jáne bul Qazaqstannyń strategııalyq maqsattarymen tolyq úılesedi», delingen málimdemede.
Qazaqstan árdaıym Taıaý Shyǵystaǵy qaqtyǵystyń halyqaralyq quqyq normalaryna, BUU tıisti qararlaryna jáne «eki halyq úshin eki memleket» qaǵıdaty negizinde ádil, jan-jaqty ári ornyqty rettelýin qoldaıdy.