Almaty oblysynda kásipkerlikti damytý – memlekettik saıasattyń basym baǵyttarynyń biri. О́ńirde 140 myńǵa jýyq belsendi shaǵyn jáne orta bıznes sýbektileri bar. Kásiporyndar oblystyń 250 myńǵa taıaý turǵynyn turaqty jumyspen qamtamasyz etip otyr. Oblysta kásipkerlik belsendilikti yntalandyrýǵa baǵyttalǵan baǵdarlamalar men qoldaý sharalary júzege asyp keledi. Onyń ıgiligin jergilikti kásip ıeleri kórip, óndirisin damytyp keledi.
Otandyq óndiristi damytýda qarlyǵashtyń qanatymen sý sepkendeı septesip, órisin keńeıtip otyrǵan qyz-kelinshekterdiń úlesi zor. Solardyń qatarynda bir qolymen besik terbetse, endi birde táttiler pisirip, otbasynyń tabysyn eseleýge umtylǵan Talǵar qalasynyń turǵyny Malına Qasymbekovanyń esimi atalady. Osydan on shaqty jyl buryn sábıimen dekrettik demalysta otyrǵan jas ana qosymsha tabys tabýdy maqsat etip úıden tátti tort pisirip, birli jarymyn satylymǵa shyǵaryp kórgen. Adam densaýlyǵyna zııandy qospasyz jasalatyn taza ári tabıǵı táttilerine qyzyǵýshylyq artpasa kemimegen. Tipti, tapsyrys kóbeıip, tort daıyndaıtyn as úı tarlyq etken. Osylaısha sátti bastalǵan isi esh kidirmesten alǵa jyljyp, ýaqyt óte kele Malına bul iske jumyssyz otyrǵan 2-3 áıeldi qosyp, kásibin keńeıte túsedi. Bul isine otaǵasy qoldaý bildirip, ata-analary balalaryna qarasyp, yntymaqtasa jumys isteıdi.
Úı ishinen bastalǵan kásibi qanat jaıyp, búginde «Malina desserts» degen ataýǵa ıe brendtik ónimderin tutynýshylardyń qatary myńdap sanalady. Aýdan ǵana emes, oblys kóleminde saýda jelisin ashyp, 7 dúkende ónimderi satylady. Alda onyń sanyn 10-ǵa jetkizý josparda bar. 100-den asa adamdy turaqty jumyspen qamtyp otyrǵan shaǵyn kásiporynnyń ıesi otandyq ónimniń sapaly da ótimdi bolýyna basa nazar aýdaryp, bul jolda tynymsyz izdenip keledi.
– Meniń mamandyǵym – qarjyger. Kondıter bolýdy oılamaǵan edim. Qyzyǵýshylyqpen bastaǵan isim irgeli kásip ashýyma túrtki boldy. Tabys ózdiginen kelmeıdi. Ol úshin tynymsyz izdenis kerek. Kásibimizdi keńeıtip, kerekti qural-jabdyq alýda memlekettik qoldaýlarǵa ıe boldyq. Tórt jylǵa jýyq jaldamaly ǵımaratta jumys istedik. Byltyr talaı jyldan beri qaraýsyz qalǵan naýbaıhanany satyp alyp, qurylys jumysyn júrgizip, kóship keldik. Sóıtip, aýmaǵy 400 sharshy metr ǵımaratta kásiporyndy iske qostyq. Josparly túrde jumys jasaımyz. Mysaly, bıyl sehty jańartýmen qatar, kofehanalardaǵy tehnıkalyq quraldardy, muzdatqyshtardy jańaladyq, – deıdi kásipker Malına Erlanqyzy.
Shaǵyn kásiporyn birneshe sehqa bólingen. Onda negizinen áıelder jumys isteıdi. Alǵashynda ydys jýýǵa ornalasqan olardyń keıbiri ýaqyt óte kele, kásipke beıimdelip, kondıter sheberleri atanǵan. Jumysshylardyń kópshiligi seh iske qosylǵan kúnnen bastap, turaqty eńbek etip júr. Olardyń arasynda kópbalaly analar da az emes.
– Memleket basshysy Qasym-Jomart Toqaevtyń bıylǵy jyldy Jumysshy mamandyqtary jyly dep jarııalaýy eńbek adamdaryna úlken serpin berdi. Qarapaıym jumysshylardyń mártebesi ósip, eńbekke degen qulshynysy artqany anyq. Bizdiń kásiporyn jumysshylarynyń arasynda 10-nan astam kópbalaly ana jumys isteıdi. Olardyń turaqty eńbek etip, nápaqasyn tabýyna qolaıly jaǵdaı jasaýǵa tyrysamyz. Sebebi ózimniń de 5 balam ósip keledi. Balanyń turmysta tarshylyq kórmeýi – ata-ana úshin mańyzdy. Kópbalaly analardyń jumys ýaqyty, úı men túzdiń tizginin teń ustaýy eskeriledi, – degen kásip ıesiniń isti úılestire bilýdegi sheberligi kópke úlgi bolarlyq.
Tam-tumdap bastaǵan isi ilgerilep, úzdiksiz jumys istegenniń nátıjesinde tabysy da arta túskenin ala tartqan Malına Erlanqyzy, búginde aýdan kólemindegi áleýmettik is-sharalarǵa qatysyp, muqtajdarǵa qolushyn berýge jarap jatqandaryn qýana jetkizdi.
Dámi til úıirer tátti ónimniń 50-ge jýyq túrin óndiretin «Malina desserts»-tiń sehynda kúnine 150 tort, 100 bálish, 1000 shaqty desert jasalyp, taratylady.
«Eńbek etseń erinbeı, toıady qarnyń tilenbeı», dep aqyn Abaı jyrlaǵandaı, mańdaı termen tapqan nan – tátti. О́nim ótimdi bolǵan saıyn, tapsyrys kóbeıip, tabys ta eselene túsedi. Sol sebepti árkim óz isine joǵary jaýapkershilikpen qarap, muqııat atqarýǵa tyrysamyz. Adal eńbek eskerýsiz qalmaıdy. Bıyl óz isiniń sheberleri laıyqty baǵasyn alyp, basshylyq tarapynan túrli syılyqqa, marapatqa ıe boldyq, – dep alty balanyń anasy Sholpan Adıshova aǵynan jaryldy.
Maqtaýly jumysshylardyń kóshin zeınet jasyndaǵy naýbaıshylar Lıýdmıla Hafýz, Aıgúl Dúkenbaeva bastasa, olardyń qataryn bas kondıter Akıza Almeshova Nazıra Qaınazarova, Sanam Iаhıarova, Shoıra Baltabaeva, Maftýna Boranova, Maqpal Áljanova syndy besaspap aspazdar tolyqtyra túsedi.
Ártúrli ult ókiliniń basyn biriktirip, ortaq maqsatta eńbek etip otyrǵan ujymnyń otandyq óndiristi óristetýge qosar úlesteri arta túserine esh kúmán joq.
Almaty oblysy