Búgin tańerteń The Washington Post basylymynda «Qazaqstannyń Ibrahım kelisimine qol jetkizýdegi pragmatıkalyq joly» atty iri maqala jarııalandy, dep habarlaıdy Egemen.kz.
Materıalda eldiń kelisimge qosylýǵa baǵyttalǵan sheshimi qalaı qalyptasqany, qandaı syrtqy-saıası maqsat kózdelgeni tereń taldanyp, jalpy mátinde Qazaqstannyń qadamy eń aldymen oılastyrylǵan, pragmatıkalyq jáne muqııat eseptelgen dep baǵalanǵan.
Maqalanyń basynda bastapqyda Vashıngtondaǵy kóptegen taraptar aldynda Qazaqstannyń bul qadamy tańqalarlyq bolyp kóringeni, kelisimge qosylý motıvasııasyna qatysty suraqtar týyndaǵany atap ótilgen. Keı tusta bul qadam «Prezıdent Trampqa arnalǵan belgi sekildi kórinedi» dep jazylǵan. Alaıda maqalada Qazaqstannyń qandaıda bir maqsatty kózdeıtini de moıyndalyp, eldiń jaǵdaıyn eskere otyryp, bul áreketti tabıǵı ári oryndy dep baǵalaǵan.
Materıalda kelesi jaıttar erekshe kórsetilgen:
Qazaqstannyń «Ibrahım kelisimine» qatysýy ári Qasym‑Jomart Toqaevtyń C5+1 formatynda AQSh-ta ótetin kezdesýler aldyndaǵy suhbaty arqyly jaryqqa shyqqan.
Amerıkadaǵy sarapshylardyń pikirine súıensek, bul sheshim «tómen shyǵynmen, biraq joǵary áserli dabyl» retinde baǵalanǵan; onyń basty maqsaty – Reseı men Qytaıǵa táýeldilikti azaıtý arqyly geosaıası áriptestikti ártaraptandyrý.
AQSh tarapynan bul qadam Qazaqstannyń batysqa ashylýyn, Vashıngtonmen yntymaqtastyqty tereńdetýge nıettiligin kórsetetin kórinedi; atap aıtqanda, Tramptyń Qytaıdyń ústemdiginen shyǵýǵa baǵyttalǵan mańyzdy mıneraldar jelisin qurýǵa mán berip jatqany tilge tıek etilgen.
Maqalanyń qorytyndysynda: «Ibrahım kelisimderine qosylý – AQSh-tyń pozıtıvti nazaryn tartýǵa baǵyttalǵan aqyldy ári pragmatıkalyq qadam» dep aıtylǵan.
Qazaqstan úshin bul qadam, jalpy alǵanda, syrtqy saıasatta táýelsizdigin kórsetip, Máskeý men Pekınnen alshaqtap, jańa baǵyttar arqyly halyqaralyq arenada ornyqty bolýǵa baǵyttalǵan strategııa retinde kórinedi.