Prezıdent Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy. Vnýkovo-2 áýejaıynda mártebeli meımannyń kelýine oraı Máskeý garnızonynyń qurmet qaraýyly men áskerı úrmeli orkestri sap túzedi. Prezıdentti Reseı Federasııasy Úkimeti Tóraǵasynyń birinshi orynbasary Denıs Mantýrov pen basqa da resmı tulǵalar qarsy aldy. Eki eldiń memlekettik ánurandary shyrqaldy.
Stýdentterdiń qazaq tilin úırenýge yntasy zor
Prezıdent osy saparynda Máskeý memlekettik halyqaralyq qatynastar ınstıtýtynyń stýdentterimen áńgimelesti.
Stýdentter Memleket basshysyna qazaqsha til qatty. Olar Prezıdent Qasym-Jomart Toqaevtyń kitaptarynda kórinis tapqan dıplomatııa men ashyqtyq qaǵıdalary Máskeý memlekettik halyqaralyq qatynastar ınstıtýtynda úlgi retinde oqytylatynyn jetkizdi.
Sonymen qatar jastar Abaı Qunanbaıuly shyǵarmashylyǵyna zor qyzyǵýshylyqpen qaraıtynyn aıtty.
– Aqynnyń «Adamzattyń bárin súı, baýyrym dep» degen dostyq týraly oı oramdary óte erekshe. Reseı men Qazaqstan – máńgilik dostyqtyń qos qanaty dep esepteımiz. Eki eldi, eki halyqty rııasyz, shynaıy dostyq qarym-qatynas baılanystyrady, – dedi jastar.
Memleket basshysy stýdentterdiń qazaq tilin úırenýge degen yntasyna joǵary baǵa berip, olarǵa sáttilik tiledi.
– Máskeý memlekettik halyqaralyq qatynastar ınstıtýty – óte bedeldi joǵary oqý orny. Búkil álemge tanymal. Qazaqstan búginde derbes memleket. Meniń oıymsha, Máskeý memlekettik halyqaralyq qatynastar ınstıtýtynda alǵan bilimderińiz bolashaqta mol paıdasyn tıgizedi. О́ıtkeni túrli elder týraly, onyń ishinde Reseıdiń burynnan kele jatqan odaqtasy Qazaqstan jaıynda kóp maǵlumat bilý sizderge keıin jumysqa ornalasýǵa, sondaı-aq álemde jáne óńirlik deńgeıde básekege qabiletti maman bolýǵa kómektesedi, – dedi Prezıdent.
Qazaqstan men Reseı Prezıdentteri beıresmı kezdesý ótkizdi
Memleket basshysy Reseı Prezıdentine erekshe syı-qurmeti úshin rızashylyǵyn bildirdi.
– Qurmetti Vladımır Vladımırovıch, eń aldymen, Máskeýge, osynaý qasıetti jerge tabanym tıgen sátten bastap kórsetilgen erekshe syı-qurmet úshin Sizge rızashylyǵymdy bildiremin. Jańa ǵana protokol aspektileri jóninde aıtyldy. Shyn máninde, Reseı astanasyndaǵy ystyq yqylas meni qatty tańǵaldyrdy ári qýantty. Ekijaqty yntymaqtastyq strategııalyq seriktestik, odaqtastyq qatynastar sıpatyna ıe. Barlyq baǵytta birlese jumys atqaryp kelemiz. Memleketterimiz arasynda eshqandaı túıtkil joq. Másele týyndaǵan kúnniń ózinde prezıdentter men úkimetter basshylarynyń kúsh-jigeri arqasynda oń sheshimin tabady. Sizdiń shaqyrýyńyzdy zor yqylaspen qabyl aldym. Rasynda, búgin beıresmı jaǵdaıda pikir almasamyz. Meniń О́zińizben talqylaǵym keletin biraz pikir-paıymym bar, – dedi Qasym-Jomart Toqaev.
Al Vladımır Pýtın Qazaqstan Prezıdentimen júzdeskenine qýanyshty ekenin jetkizdi.
– Qurmetti Qasym-Jomart Kemeluly, eń aldymen, Sizge ýaqyt taýyp, keliskenimizdeı, memlekettik saparmen kelgenińiz úshin alǵys aıtamyn. Buǵan shyn júrekten qýanyshtymyn. Árıne, biz udaıy baılanystamyz. Alaıda memleketaralyq qatynastarda mundaı protokoldyq dúnıeler de mańyzdy. Búgin beıresmı jaǵdaıda kezdesip, barlyq ózekti másele boıynsha áńgimelesemiz. Al erteń áriptestermen birge ekijaqty qarym-qatynastyń kún tártibin qarastyramyz jáne keleshegi zor baǵyttarǵa nazar aýdaramyz. Jalpy alǵanda, biz osy jyldy óte jaqsy nátıjelermen aıaqtaımyz, sondaı-aq taıaý keleshekke arnalǵan jospardy oryndaımyz dep oılaımyn, – dedi Reseı Prezıdenti.