Astanada jyldyń basty sporttyq saıystarynyń biri paralımpıadalyq bochchadan Qazaqstan kýbogi úshin jarys ótip jatyr. Osyǵan oraı elordadaǵy «Aspan» sport kesheninde 8 kort jasaqtalyp, alǵash ret alań sany boıynsha rekordtyq kórsetkish tirkeldi. Elimizdiń 15 óńirinen kelgen parasportshylarǵa Senat tóraǵasy, Qazaqstan bochcha federasııasynyń prezıdenti Máýlen Áshimbaev qoldaý bildirdi.
Máýlen Áshimbaev jarysqa qatysýshylarǵa iltıpat bildirip, jyl ótken saıyn elimizde bochcha qarqyndy damyp kele jatqanyn atap ótti. Memleket basshysy Qasym-Jomart Toqaevtyń parasportshylardy qoldaý, ınklıýzıvti, kedergisiz orta qalyptastyrý baǵytyndaǵy tapsyrmalaryn oryndaý aıasynda múddeli taraptarmen birlesip keshendi jumys júrgizilip jatyr. El kýbogi – sol aýqymdy jumystyń bir bóligi. Sondaı-aq federasııa ókilderi men jattyqtyrýshylar atalǵan saıys Qazaqstanda bochchany damytýǵa, dáripteýge, sporttyq sheberlik deńgeıin arttyrýǵa jáne ulttyq quramany jasaqtaýǵa baǵyttalǵanyn aıtty.
«Prezıdent Qasym-Jomart Toqaev elimizde ınklıýzııa mádenıetin odan ári damytý jáne múmkindigi shekteýli azamattardyń sport arqyly da qoǵam ómirine tolyqqandy qatysýy úshin qajetti jaǵdaı jasaý mańyzdy mindet ekenin únemi aıtyp keledi. Bul rette bochcha aıryqsha mánge ıe. Sebebi bul – tártip qalyptastyryp, strategııalyq oılaýdy damytatyn jáne múmkindigi shekteýli azamattardyń ortaǵa beıimdelýine yqpal etetin sport túri. Sizder bochchadan Qazaqstan kýbogi jolyndaǵy jarysqa qatysý arqyly qoǵamda mańyzdy qundylyqtardy nasıhattaısyzdar. Sondaı-aq sizderdiń tabandylyqtaryńyz ben eńbekqorlyqtaryńyz zamandastaryńyzdy yntalandyratyny anyq», dedi Bochcha federasııasynyń prezıdenti.
Aıta keteıik, jarys 9-14 qarasha kúnderi ótedi. Onda 11-14 jas aralyǵyndaǵy jasóspirimder men 15 jastan asqan eresekter jeke, juptyq jáne komandalyq saıystar boıynsha baq synaıdy. Jarys jolynda elimizdiń 15 óńirinen: Astana, Almaty, Shymkent qalalary men Batys Qazaqstan, Atyraý, Mańǵystaý, Aqtóbe, Soltústik Qazaqstan, Qaraǵandy, Jambyl, Túrkistan, Pavlodar, Shyǵys Qazaqstan, Abaı jáne Jetisý oblystarynan kelgen 120 parasportshy ózara myqtyny anyqtaıdy.
El kýbogi jolyndaǵy baıraqty básekeni Múmkindigi shekteýli sportshylardy sporttyq daıarlaý ortalyǵynyń, Astana qalasynyń dene shynyqtyrý jáne sport basqarmasynyń uıytqy bolýymen, sondaı-aq seriktester men demeýshilerdiń qoldaýymen Qazaqstan bochcha federasııasy uıymdastyrǵanyn atap ótken jón.