Burnaǵy kúni «Qaırat» Eýropa lıgasy irikteý týrnıriniń úshinshi raýndy sheńberinde Shotlandııanyń «Aberdın» komandasymen qarymta kezdesý ótkizdi. Keltter elinde bolǵan match 1:1 esebimen teń aıaqtaldy. Apta buryn qos komanda Almatyda kúsh synasyp, alań ıeleri 2:1 esebimen jeńiske jetken edi. Osy eki oıynnyń nátıjesi boıynsha «Qaırat» atalǵan týrnırdiń pleı-off básekesine joldama aldy. Aberdındegi aıqastyń birinshi taımynda shotlandtar óte shıraq qımyldady. Al qaırattyqtar negizinen qarymta shabýylǵa ıek artyp, kóbine qorǵanysqa kóńil bóldi. Nátıjesinde qarsylastar úziliske deıin esep asha almady.
Matchtyń ekinshi bóligi de alań ıeleriniń basymdyǵymen bastaldy. Olar birneshe ótkir shabýyldar uıymdastyryp, bizdiń qaqpany nysanaǵa alǵanymen, «Qaırattyń» qorǵanysy syr bermedi. Esesine, 59-mınýtta «Aberdınniń» qorǵaýshylary qonaqtardyń shabýylshysy Jerar Goýdan kóz jazyp qaldy. О́zine berilgen múmkindikti utymdy paıdalanǵan Forvard gol soǵyp, esep ashty. Tablodaǵy nátıje tek 84-mınýtta ózgerdi. Kezekti shabýyldarynyń birinde aberdındikter tarazy basyn teńestirip ketti. Dopty qaqpaǵa engizgen – Kennı Maklın. Bul nátıje oıyn sońyna deıin saqtaldy. Osylaısha, eki kezdesý qorytyndysy boıynsha «Qaırat» kelesi aınalymǵa shyqty. Almatylyqtar mundaı nátıjege klýb tarıhynda tuńǵysh ret qol jetkizip otyr. Buǵan deıin Eýropa lıgasy irikteý týrnıriniń pleı-off básekesinde otandyq komandalardan «Aqtóbe» men «Astana» oınap kórdi. О́kinishke qaraı, eki jasaq ta odan ári asa almady. Al 2013 jyly Qaraǵandynyń «Shahteri» týrnırdiń toptyq saıysynda oınaǵan bolatyn. «Kenshiler» bul múmkindikke Chempıondar lıgasy irikteý týrnıriniń pleı-off synyna shyǵý arqyly qol jetkizdi. Aıta keteıik, keshe Shveısarııanyń Non qalasynda Chempıondar lıgasy men Eýropa lıgasy irikteý týrnırleriniń pleı-off syny úshin jerebe tartý rásimi ótti. Sonyń qorytyndysyna sáıkes, «Qaırat» toptyq kezeńniń joldamasyn Fransııanyń «Bordo» komandasymen sarapqa salady. Alǵashqy oıyn 20 tamyzda oınalsa, qarymta kezdesý bir aptadan keıin ótedi. Birinshi match Fransııada bolatynyn aıta keteıik. Al Chempıondar lıgasynda el namysyn qorǵap júrgen «Astana» bul aınalymda Kıprdiń APOEL-imen kúsh synasady. Qos komanda aldymen Astanada, keıin Kıprdiń Nıkosıa qalasynda sheberlik baıqasady. Atalǵan oıyndar 18-19 jáne 25-26 tamyzda oınalady dep kútilýde.
Elaman QOŃYR, «Egemen Qazaqstan».