Jambyl oblysy, T.Rysqulov aýdany, Kógershin aýylynyń týmasy, talantty balýan Nurjan Asan AQSh-tyń Nıý-Iork qalasynda ótken «Bill Farrell International 2025» týrnırinen júldeli oraldy. Grek-rım kúresinen 87 kg salmaqta kúmis medal ıelendi.
Saıysqa 300-den astam balýan qatysty. Alǵashqy aınalymnan-aq qarsylastaryn aıqyn jeńgen Nurjan fınalǵa erkin jetti. Altyn medal úshin tartysta amerıkalyq balýanǵa upaı aıyrmasymen ese jiberdi. Balýan byltyr da osy bási joǵary týrnırden júldeli oralǵan edi.
– Bul kúmis medal uzaq jylǵy tókken terimizdiń óteýi. Bizge árbir medaldiń baǵasy qundy. Nurjan óte eńbekqor, talapshyl, balýan. Bul joly da rýhynyń qaısarlyǵyn kórsetti, – deıdi jeke bapkeri Rınat Ismaılov.
Nurjan grek-rım kúresimen 12 jyldan beri turaqty shuǵyldanady. 2022 jyly Brazılııada ótken XXIV jazǵy Sýrdlımpıada saıysynda 77 kg salmaqta qola medal enshiledi. Sol jyly álem chempıony atandy. 2023 jyly Azııa oıyndarynda jeńiske jetti. Byltyr eńbek sińirgen sport sheberi ataǵyn aldy. Balýan búginde AQSh elinde sheberlik sabaqtaryn ótkizip, jas balýandardy kúreske baýlyp júr.
– Qaı qıyrda júrsek te qazaqtyń rýhy joǵary ekenin áıgileýge kúsh salamyz. Elimniń Kók týyn jelbiretip, Ánuranymyzdy shyrqatý – basty maqsatym. Tórt jyl buryn Sýrdlımpıada oıyndarynda qola medal buıyrdy. Árkimniń de armany – altyn medal. Soǵan jetý jolynda tynymsyz ter tógip, tyńǵylyqty ázirlik júrgizemin, – deıdi talantty sportshy.
Balýan aldaǵy ýaqytta da sheberligin shyńdap, saıystarǵa qatysýǵa bel býyp otyr.