Memleket basshysy Qasym-Jomart Toqaev aýyl sharýashylyǵy eńbekkerlerine rızashylyǵyn bildirdi, dep habarlaıdy Egemen.kz Aqordanyń baspasóz qyzmetine silteme jasap.
«Eń aldymen, barsha aýyl sharýashylyǵy eńbekkerlerine kásibı merekelerińiz qutty bolsyn deımin. Bul shyn máninde, naǵyz eńbek adamdarynyń meıramy ekeni sózsiz. Dıqandar, mal sharýashylyǵy mamandary, sharýalar – bári de elimizdiń ósip-órkendeýine zor úles qosýda. Qajyrly eńbekterińiz úshin Sizderge shynaıy rızashylyǵymdy bildiremin. Aýyl sharýashylyǵy – ekonomıkamyzdyń strategııalyq máni aıryqsha salasy. Búgin, mine, aýyl sharýashylyǵyna arnalǵan ekinshi forýmdy ótkizip jatyrmyz. Alqaly jıynǵa aýyl-aımaqtardan kóptegen bilikti mamandar arnaıy kelip, qatysyp otyr. Sondyqtan búgingi forýmdy jalpyulttyq aýqymdaǵy basqosý deýge bolady. Jańa sóz sóılegen azamattar salmaqty oılaryn aıtty, usynystardy muqııat qarap, mindetti túrde eskerý qajet», dedi Prezıdent.
Memleket basshysy aýyl sharýashylyǵynyń árdaıym memleket nazarynda ekenin atap ótip, Prezıdent retinde osy salanyń qarqyndy damýyna erekshe mán beretindigin jetkizdi.
«Halqymyz «Egin ekse – el toq» dep beker aıtpaǵan. Byltyr biz mol astyq alyp, sońǵy on jyldaǵy rekordtyq kórsetkishke qol jetkizdik. Bıyl da kúzgi jıyn-terin berekeli boldy. Dıqandarymyz 27 mıllıon tonna astyq jınady. Ár aımaq el qambasyna mol úles qosty. Sonyń ishinde Aqmola oblysy eń joǵary kórsetkishke (7,5 mıllıon tonna) ıe boldy. Qyrkúıek aıynda egin oraǵynyń barysyn kórý úshin oblysqa arnaıy barǵanymdy bilesizder», dedi Qasym-Jomart Toqaev.