Ázerbaıjandyq úshem men qyrǵyzstandyq egiz qyzdar qazaq tilin úırenip júr. Olardyń elimizge arnaıy kelip oqýdy bastaǵanyna nebári bir aı bolǵan. Soǵan qaramastan, tyńdaýshylar qazaqsha erkin sóılep, oıyn jetkize alady.
Túrki elderiniń jastary Qoja Ahmet Iаsaýı atyndaǵy Halyqaralyq qazaq-túrik ýnıversıtetine 30 jyldan asa ýaqyttan beri bilim alýǵa keledi. Bıyl osy ýnıversıtettiń Daıyndyq ortalyǵynda Ázerbaıjannan kelgen úshem – Zehra, Esra jáne Lala Azızovalar men Qyrǵyzstannan kelgen egizder – Batma jáne Zýýra Akkanalıevalar bilim alyp jatyr. Oqytýshylardyń aıtýynsha, tyńdaýshylardyń jańa tilderdi úırenýge degen qyzyǵýshylyǵy men yntasy joǵary.
«Qazaqstanda joǵary bilim alýdy tańdaýymyzǵa birneshe sebep bar. Eń bastysy, túrki elderinen kelgen stýdenttermen tanysyp, ortaq mádenıetimiz ben tarıhymyzdy tereńirek tanyǵymyz keldi. Sondaı-aq túrki áleminiń rýhanı astanasy sanalatyn Túrkistan qalasynda bilim alý – biz úshin úlken mártebe», deıdi egizder. Al úshemder: «Bizdiń túr-sıpatymyz uqsas bolǵanymen, tańdaǵan mamandyǵymyz ártúrli. Birimiz – psıholog, birimiz – dáriger, endi birimiz muǵalim bolǵymyz keledi», deıdi.
Aıta keteıik, Daıyndyq ortalyǵynda oqý ordasynyń ishki granty negizinde Túrki memleketterinen kelgen jastar bilim alyp, qazaq tilimen qatar túrik jáne aǵylshyn tilderin de meńgeredi. Qazirdiń ózinde ortalyqta túrki memleketterinen kelgen 296 tyńdaýshy bar. Olar bir jyl kóleminde tildik daıyndyqtan ótip, qorytyndy emtıhan nátıjesinde tańdaǵan mamandyǵy boıynsha oqýyn jalǵastyrady. Solardyń qataryndaǵy úshem men egiz qyzdar da Daıyndyq ortalyǵyn aıaqtaǵannan keıin óz qalaýyna qaraı bilim jetildirýdi josparlap otyr.