Shaǵalaly Shardara

Oblys ákimdigi «Balyq sha­rýa­shylyǵyn 2015-2017 jyl­darǵa deıingi damytý» baǵdar­lamasyn qabyldaǵan. Osy rette Shardarada qandaı sharýalar atqarylatyndyǵy, jobalardyń qarjylandyrý tetikteri tal­qylanǵan. Nátıje jaqsy. Buryn 3800 tonna balyq aýlanyp kelse, qazir aýdanda 8 000 tonnaǵa deıin balyq aýlanady. Bolashaqta 27 taýarly balyq sharýashylyǵy iske qosylmaq. Daıyn ónimdi Eýropa naryǵyna eksporttaý úshin qosymsha 400 mln. teńge bólinedi. Bul sharýaǵa kerekti qar­jy «Maksımým» aımaqtyq ın­­ves­­tısııalyq ortalyǵynan beril­mek. Shardarada oblys ákimdi­giniń uıymdastyrýymen ótken semı­nar-keńeste osyndaı jaǵdaıattar aıtyldy. Semınarǵa qatysýshylar «Hamıt» selolyq tutyný koope­ratıviniń 387 gektar aýmaqty alyp jatqan balyq sharýashylyǵynda boldy. Munda balyqty qabyldap alǵannan tazartyp, fılesin muzdatqyshqa salyp, daıyn ónimdi qoraptarǵa qattaýǵa deıingi prosester atqarylady. Shardarada sý qoımasy balyq sharýashylyǵynan tabys tabýdyń úlken múmkindigin kórsetip otyr. Údemeli ındýstrııalyq-ınnovasııalyq damý baǵdarlamasy aıasynda taǵy eki shaǵyn balyq zaýyty men bir balyq óńdeý sehy iske qosylý ústinde. Balyq kásiporyndary shabaqtardy kól aýmaǵyndaǵy torda ósirý ádisin meńgerip alǵan. Brakonerlerdiń shabaqtarǵa deıin súzip alatyn qytaı torynda ketpeıdi, kóldiń kórkine aınalyp kóbeıedi. Bul qanatqaqty jobanyń osyndaı erekshelikteri bar. Aýdanǵa jumys saparymen barǵan oblys ákimi Asqar Myrzahmetov taǵy bir kúrdeli máseleniń túıinin tarqatyp qaıtty. Shardara – Ońtústiktiń oblys ortalyǵynan eń alys aýdany. Joldar jóndeýden ótti degenmen, mashınaǵa uzaq. Keńes ókimeti dáýirlep turǵan shaǵynda Shymkent–Shardara baǵytynda AN-24 sııaqty ushaqtar qatynaǵan. Asqar Myrzahmetov eski áýejaıda boldy. Uzyndyǵy 1625 metr, betondalǵan aýmaǵy 75 myń sharshy metrdi quraıtyn aeroport kesheni qaıta qalpyna keltirilý úshin kúrdeli jóndeýden ótedi. Oblystyq energetıka, tur­ǵyn úı-kommýnaldyq sharýa­shylyq jáne jolaýshylar kóligi basqar­ma­synyń basshysy Nurlan Aldamjarov: «Ju­mys tobyn qurý jóninde oblys ákimi sheshim shyǵardy. Áýe­jaıdy qaı­ta qurylymdaý jumy­sy bir aı kó­leminde basta­lyp, eki aıdyń ishin­de aıaqta­lýy tıis. Bul sharýaǵa 200 mln. teńge jumsalmaq. Jóndeý ju­mystary «Ońtústik SPK» ar­qyly júrgiziledi. Alla jazsa eki aıdan keıin Shardaranyń áýejaıy alǵashqy ushaqtaryn qa­byl­daıtyn bolady», dedi. Shardara – shalqar kól. Jaǵalaýy shańsyz altyn qum. Demalys oryndary kóp. Basqa oblystardan da adamdar kelip kólge túsip, balyq aýlap kúnge qyzdyrynyp rahattanyp jatady. Iаǵnı, ishki týrızmdi damytýǵa naǵyz laıyq jer. Al týrızm degenińiz – qazynaǵa quıylǵan qarjy, qosymsha jumys kúshi. Shaǵalasy sharq urǵan Shar­dara aspanynda endi kúmis qanat ushaqtar da jıi kórinetin kún alys emes. Aýdan ákimi Qamytbek Aı­tóreev bolashaqta Almaty, Asta­nadan da áýe kemeleri Shardaraǵa qatynaıdy deıdi.

Baqtııar TAIJAN, «Egemen Qazaqstan».

Ońtústik Qazaqstan oblysy.