Keshe Aqordada Qazaqstan Respýblıkasynyń Memlekettik hatshysy G.Ábdiqalyqovanyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótip, onda 2016-2020 jyldarǵa arnalǵan «Bolashaq» halyqaralyq stıpendııasyn damytý jospary qaraldy. Otyrysta Memlekettik hatshy Qazaqstan Prezıdentiniń «Bolashaq» halyqaralyq stıpendııasynyń áleýetin Memleket basshysynyń bes ınstıtýttyq reformasyn iske asyrý jónindegi «100 naqty qadam» – Ult josparyn iske asyrýda keńinen qoldaný qajettigin atap ótti. «Sońǵy kezde osy baǵdarlama boıynsha 2016-2020 jyldarǵa deıingi usynys daıyndaldy. Ol usynystar qazir «100 naqty qadam» – Ult josparymen baılanystyrylyp jatyr. Sondyqtan da, Premer-Mınıstrdiń qatysýymen Úkimette de birneshe ret qaraldy. Endi Elbasyna basty usynystardy engizýimiz kerek», – dedi G.Ábdiqalyqova.
Bul rette Komıssııanyń ótken jylǵy otyrysynda Memlekettik hatshy Qazaqstan álemniń eń damyǵan 30 eline kirý jolyndaǵy qaryshty qadamy sanalatyn Elbasynyń «Nurly Jol» Jańa Ekonomıkalyq Saıasaty aıasyndaǵy joǵary bilikti kadrlardy daıarlaý aıryqsha mańyzǵa ıe ekendigine ekpin bergen-di. Keshegi otyrys ta bilikti kadrlar daıarlaý máselesiniń áli de jetildirile beretinin kórsetti. Sondaı-aq, Komıssııa músheleri «Bolashaq» halyqaralyq stıpendııasynyń 2016-2020 jyldarǵa arnalǵan damý josparyn maquldady. Bul rette damý josparynda kózdelgen «Bolashaq» stıpendııasyn damytýǵa jáne jetildirýge baǵyttalǵan bastamalar talqylanǵandyǵyn aıta ketý kerek. О́ıtkeni, elimizdegi aýqymdy ınfraqurylymdyq damý, jańa óndiris oryndaryn qurý jáne el óńirleri arasynda kólik kommýnıkasııalarynyń barlyq túrleri arqyly bıznes yntymaqtastyqty jandandyrý úshin de biliktilikke ıe joǵary deńgeıli menedjerlerge degen qajettilikti týdyratyny belgili jaıt. Sonymen qatar, jıynda kezekti konkýrstyq irikteýdiń úmitkerlerine stıpendııa taǵaıyndaý máseleleri jáne azamattardyń ótinishteri qaraldy. Otyrys qorytyndysy boıynsha Memlekettik hatshy G.Ábdiqalyqova Shetelde kadrlar daıarlaý jónindegi respýblıkalyq komıssııanyń jumysyn odan ári uıymdastyrý boıynsha birqatar naqty tapsyrmalar berdi.
Asqar TURAPBAIULY, «Egemen Qazaqstan».