Roza Baǵlanova atyndaǵy «Qazaqkonsert» memlekettik akademııalyq konserttik uıymy 19 qarasha kúni talantty jas bıshi, halyqaralyq baıqaýlardyń laýreaty, aty ańyzǵa aınalǵan «GULDER» ansambliniń ártisi Aqqanat Smaǵulovanyń jeke shyǵarmashylyq keshin ótkizedi. Osy oraıda bı áleminde ózindik qoltańbasyn qalyptastyryp, ulttyq horeografııanyń abyroıyn asqaqtatyp kele jatqan jas ónerpazben suhbattasýdyń sáti tústi.
– Jeke shyǵarmashylyq kesh – ár ónerpaz úshin óz jolyn baǵamdap, ónerdegi órisin kópshilikke tanytatyn, tulǵalyq bolmysyn aıshyqtaıtyn mańyzdy beles sanalady. Osyndaı mańyzdy kúnge daıyndyǵyńyz qalaı?
– Bul meniń alǵashqy jeke keshim bolǵandyqtan, árıne qobaljý bar. Baǵdarlamada túrli baǵyttaǵy bı qoıylymdary bolady. Ony otandyq belgili baletmeısterler ári ustazdarym Anvara Sadyqova, Almat Shámshıev, onymen qosa Ernur Qaryqbolmen birlesip daıyndadyq. Konserttiń negizgi taqyryby – qus beınesi. Sımvolıkalyq máni esimime úndes. Ár obraz – meıli ol «Aqqý», «Qarlyǵash», «Qaratorǵaı» ne «Taýys» bolsyn ózindik horeografııalyq tili, máneri, stıli men kostıými arqyly erekshelenedi. Kesh barysynda biraz jańa qoıylymdar kórermenge alǵash ret usynylady. Álem halyqtarynyń bıleri, kóshe bıi mádenıetiniń horeografııalyq kompozısııalary da bolady. Janr alýandyǵy men horeografııalyq kúrdeli qoıylymdar keshtiń basty erekshelikteriniń birine aınalmaq.
– Keshte taǵy kimder óner kórsetedi?
– Konsertke elimizdiń tanymal ártisteri Maqsat Medeýbek, Álı Oqapov, Mádı Rymbaev, Álibek Almadıev, Aızat Qarabek, Aıdan Qaljan, Venera Tabys, Áıkerim Elemes, Merýert Baqyt, «Astana sazy» qazaq memlekettik folklorlyq ansambli, «Samga» kvarteti, sondaı-aq ózimniń shyǵarmashylyq otbasym – «GULDER» ansambli qatysady. Osyndaı kásibı áriptestermen birge sahnada óner kórsetý – zor mártebe.
Keshtiń ıdeıa avtory ári bas baletmeıster – Anvara Sadyqova, kórkemdik jetekshisi – Abzal О́simbaev, pedagog-repetıtor – Dana Qýanyshbekova, kostıým boıynsha sýretshi – Ásel Luqpanova, konsert rejısseri – Dýman Ákim, jaryq boıynsha sýretshi – Evgenıı Tıhonın. Bul konsert – bizdiń úlken ujymnyń birlesken eńbeginiń nátıjesi dese bolady.
Osy oraıda daıyndyq barysynda kórsetken qoldaýy men eńbegi úshin Roza Baǵlanova atyndaǵy «Qazaqkonsert» memlekettik akademııalyq konserttik uıymynyń basshylyǵyna jáne áriptesterime shynaıy alǵysymdy bildiremin.
– Shyǵarmashylyq jolyńyzdy zertteı otyryp, Germanııada ótken «TANZOLYMP» bedeldi halyqaralyq horeografııalyq baıqaýda altyn medalge ıe bolǵanyńyzdy baıqadym. Sol sát týraly aıtyp ótseńiz.
– Iá, Germanııada ótken halyqaralyq festıvalde óner kórsetý men úshin úlken tájirıbe ári jaýapkershilik boldy. О́ner dodasynda Anvara Sadyqova qoıǵan «Aqqý» jáne Almat Shámshıev qoıǵan «Erke bala» atty eki bı usyndym. 800-den astam ónerpaz baq synaǵan bul baıqaýda bar bolǵany 34 qatysýshy irikteýden ótti. Sonyń biri retinde gala-konsertte óner kórsetý baqyty buıyrdy. Sahnaǵa shyqqanda men qazaq bıi men mádenıetin tanystyryp turǵanymdy sezindim. О́ner kórsetkennen keıin kórermender kelip, jyly lebizderin bildirip, tipti bireýlerdiń kózine jas alǵanyn kórdim. Sol sát men úshin naǵyz jeńis boldy. Sebebi shetel sahnasynda qazaq ónerin tanytý – eń úlken marapat.
– Áńgimeńizge rahmet. Erteńgi shyǵarmashylyq keshińiz tyńdarmanǵa shabyt syılap, jańa belesterge jol ashsyn. О́ner jolyńyz árdaıym jarqyn bolǵaı!
Áńgimelesken –
Zeıin ERǴALI,
«Egemen Qazaqstan»